EDITORYAL - Road sharing sa bike lanes

Gigahinan sa gobiyerno og P1 bilyon nga pundo karong tuiga ang mga magbisekleta. Gipaabot nga dunay daghang bike lanes ang ug mga estraktura para kanila ang kadalanan.

Tumong niini ang luwas nga paggamit sa mga siklista sa dalan tungod kay giisip na kini karon nga alternatibong transportasyon baylo anang tradisyonal nga de-makinang mga sakyanan o motorsiklo nga nagdala og polusyon.

Ang 2024 General Appropriations Act migahin og pundo para sa Department of Transportation's Active Transport and Safe Pathways Program (ATSPP), mas dako kini og P500 milyones itandi sa orihinal nga giduso nga pundo para sa maong katuyoan karong tuiga.

Apan dinhi sa Sugbo, daghan sa mga bike lanes ang nangapapas na, ug para sa ubang motorista kay wala nay pintal o linya, wala nay bike lanes ug nakig-kompetisyon na sab sila og gamit aning bahina sa karsada.

Peligro ang karsada para sa mga magbisekleta, ilabi na sa mga dagkong mga karsada nga diin sagol ang nagkalain-laing mga sakyanan nga nagdagan.

Kaning mga bike lanes mayo lang unta og kini adto lang ipamutang sa mga lagpad gyud nga karsada, dilis a mga gagmay nga mga dalan.

Kay sa pagkakaron, dunay mga bike lanes nga nakatampo hinuon sa problema sa kahuot sa trapiko kay migamay ang agianan sa mga sakayanan.

Usa sa maayong solusyon niini mao ang pagpatuman og road-sharing scheme sa bike lanes. Dili lang bisekleta maoy ekslusibong mogamit sa bike lanes, dapat hasta sab ang mga motorsiklo ug mga e-bikes.

Kung dili gud kini himuon, mahimo sinugdanan sa kasamok ug road rage sa mga road users ang bike lanes ilabi na sa mga piot nga mga dalan.