Mas dyutay ang nabuthan

Dako ang pagkunhod sa gidaghanon sa mga nabuthan atol sa pagsugat sa Pasko ug Bag-ong Tuig dinhi sa Central Visayas, kini sigun sa talaan sa Department of Health.

Sukad niadtong Disyembre 21, 2023 hangtud sa Enero 1, 2024 aduna lay 41 ka mga kaso sa firecracker injury dinhi sa atong rehiyon.

Ang labing daghan niini dinhi sa lalawigan sa Sugbo nga dunay 21 ka kaso, ang syudad sa Sugbo dunay siyam samtang upat sab sa probinsiya sa Bohol. Ang Dakbayan sa Mandaue u gang lalawigan sa Negros Oriental dunay tag-tulo ka mga kaso samtang ang dakbayan sa Lapu-Lapu duna lay usa ka kaso.

Ang maong gidaghanon sa mga naangol tungod sa pabuto minus kaayo kun itandi sa 83 ka mga kaso niadtong 2022. Ug sigun sa DOH, ang sagad pa gyud nga hinungdan mao ang binuhat nga lantaka gamit ang PVC pipe ug kawayan.

Ug kun inyong namatikdan mas minus na sab kaayo ang pabuto atol sa pagsugat sa Pasko ug Bag-ong Tuig. Nagpasabot ba ni nga epektibo ang kampanya sa gobyerno batok sa pabuto? Tingali, apan sa akong tan-aw ang kawad-on ug nagkamahal nga presyo sa firecracker maoy nag-unang hinungdan.

 Ang mga tigbaligya og pabuto sab admitido nga nagkadyutay na gyud ang mga tawo nga mopalit og firecrackers. Ang report sa DOH nga nagpakita nga mas daghan ang naangol sa lantaka kay sa mga firecracker nagpasabot lang nga wala mausab ang kaikag sa mga tawo nga magpabuto apan napugos paghunong og palit og firecracker tungod sa kawad-on. Inay igasto sa pabuto mas gipili sa kadaghanan nga ipalit og pagkaon aron masaw-an sa pamilya alang sa Noche Buena ug Media Noche.

Ug kini maoy labing haum ug angay nga buhaton sa matag-pamilya unahon ang panginahanglan kaysa kapritso ug palihi nga way hinungdan kay bisan ang kadagkuan sa Simbahan wala magtudlo niini.