Seryosong problema sa seguridad

Wa pa ko malimot sa deklarasyon ni Mayor Michael Rama nga sugod niadtong Hunyo 12, 2023, Independence Day, wa nay libud-suroy ug mga basura nga makitang magpasad sa kadalanan sa dakbayan sa Sugbo.

Apan human sa unom ka buwan way nahitabo sa iyang pasiatab isip kabahin kuno sa iyang damgo nga mahimong sama sa Singapore ang syudad. Human sa tunga sa tuig sukad sa iyang way pupanaga nga deklarasyon, duna pa gihapoy daghang libud-suroy sa kadalanan ug may basura pa gihapong makit-ang nagpasad sa kadalanan.

Ang labing dakong sagpa ug daw nanulisok sa dakong palpak sa saad sa mayor mao ang gidangatan sa usa ka Janra Gimenez didto sa IT Park sa Barangay Apas niadtong miaging gabii. Si Gimenez paingon na untang mobiya sa usa ka parking lot dihang giduol siya sa grupo sa mga libud-suroy nga minor de edad.

Gipangayoan siya og kwarta, apan sa dihang iyang gibalibaran gibato ang iyang sakyanan hinungdan sa pagkabuak sa winshield niini. Dili ni unang higayon nga nahitabo ang maong insidente diha sa IT Park. Sigun sa post ni Gimenez sa Facebook, diha nay mga hitabo niadto nga sama niini ug mas grabi pa gani. Diha kunoy insidente nga nalandig gyud sa tambalanan ang usa ka parking attendant dihang gihapak og bato sa mga batan-on human masuko nga gibadlong. Bisan ang mga gwardiya sa IT Park gikatahong way mahimo sa lampingasan nga mga libud-suroy tungod kay sila mismo nabalaka sa ilang siguridad.

Kun diha mismo sa primyadong dapit sa dakbayan nga duna pa gani kaugalingon nga security personnel mahitabo ang ingon niini, dunay seryosong problema sa kahapsay ug kalinay ang dakbayan. Problema nga unta malikayan kun puy-an sa atong mga opisyal ang ilang mga pulong ug di kay kutob ra sa pagarpar.

Kun gitinuod sa mayor ang iyang deklarasyon nga hipuson ang mga libud-suroy sugod niadtong Hunyo 12, 2023 tingali wa nay nabiktima sa ilang kabarumbado. Hinaot hatagan og prioridad sa mayor ang maong problema diha sa IT Park aron malikayan nga masubli ang maong panghitabo labi pa nga ang maong dapit suroyanan dili lang sa mga Sugboanon kun di lakip na sa mga langyaw nga dia sa Sugbo.

Tingali mas mahinungdanon nga dunay polis nga regular nga magpatrolya sa maong dapit inay nga magpunsisok isip bodyguard ug escort sa atong mga opisyal.