Nangluod

Sukad paglusad ni Mayor Michael Rama sa “Gubat sa Baha” dinhi sa dakbayan sa Sugbo uban sa mga retiradong heneral nga sila si Roy Cimatu ug Melquiades “Mel” Feliciano nasayod nang daan ang publiko nga di ning molampos og kutob ra sa cleanup drive ilang buhaton.

Labaw pa sa mga cleanup drive ang gikinahanglan ang molampos ang kampanya batok sa baha dinhi sa dakbayan. Sa ako nang gibalik-balik sukad pa niadto nga gikinahanglan ang “political will” sa mga opisyal sa dakbayan labi pa sa mayor.

Kinahanglang mangisog ang mayor pagpangguba sa mga illegal nga istraktura nga nakaali sa mga agianan sa tubig ug nagkinahanglan og dakong kantidad aron ipatuman ang kumprehinsibo nga plano sa drainage—pagpalapad sa kasamtangan nga mga agianan sa tubig. Apan wala ni mahimo ni Rama.

Wala gyud siya kapaguba sa mga dagkong patigayon nga milapas sa three meter easement. Ang The Freeman miboluntaryo na og guba sa kabahin sa paril niini nga nakalapas sa easement zone apan inutil ang syudad pagbadlong sa ubang mga edipisyo nga tupad niini.

Si Feliciano nga maoy gitudlo ni Rama nga chief implementer sa Task Force Gubat sa Baha mipahibawo na sa iyang pagkanaog sa katungdanan. Ang hinungdan mao ang kahiubos tungod sa kakuwang og kooperasyon sa ubang mga opisyal.

Wala sab mauyoni ni Feliciano ang pamahayag ni Rama ngadto niya nga kinahanglang tarungon niya ang iyang trabaho kun gusto kining magpabilin sa pwesto.

Alang ni Feliciano nga wa magdawat og sweldo ug igo lang mitabang sa kampanya batok sa baha dili makiangayon ang maong pamahayag. Kun duna may wala mohimo sa trabaho dili si Feliciano kun di si Rama mismo.

Way mahimo si Feliciano pagsulbad sa baha sa syudad kun si Rama mismo magmika sa iyang obligasyon pagbadlong sa mga malapason ug molingiw sa tinuod nga sulbad sa problema nga mao ang pagpatuman sa comprehensive drainage program.