Tuyok sa ligid sa kapalaran
Nahibawo ka nga ang imong kaatbang dunay dautang plano batok nimo. Nahibawo ka nga duna siyay igong gahom sa paglisudlisod nimo. Nahibawo ka nga wa kay dag-anan niya. Nahibawo ka nga, kay siya may nagtungkawo sa puwesto, matuman ang bisan unsa niyang gusto.
Pero nagpabilin kang nisalig nga duna ka pay igo nga nahibiling influencia aron nga di siya makapatuyang sa iyang gibati. Naglaom nga duna kay mga higala nga iya sang mga higala nga makapugong sa iyang pangabuso. Hangtod nga imong namatngonan nga mahimong matinuod ang tanan nimong gikahadlokan.
* * *
Posibleng mao ni ang nabatyagan karon ni kanhi Presidente Rodrigo Duterte. Kinsa nipalit sa away sa iyang anak nga si Bise Presidente Sara Duterte Carpio ug ni House Speaker Martin Romualdez. Kay nakalimot nga wa na siya sa gahom.
Bisan sa mga pasidaan nga tuohan pa siya sa militar ug kapolisan, gipapas ang confidential funds sa iyang anak, gikiha siya og grave threat ug gisuspenso ang iyang programa ug dayon ang tibuok TV network. Ug kalit lang nidako ang kahigayonan nga ilawog siya ngadto sa International Criminal Court (ICC).
* * *
Pasaligan nako ang kanhi presidente nga mao sab ni ang nabatyagan namong mga kanhi trabahante dayo niyang pawong sa ABS-CBN niadtong 2020. Nahibawo mi sa iyang kamaginukdanon ug hingpit nga pagkontrolar sa Kongreso.
Pero naglaom ming makumbinser ang mga kongresista sa pagmatuod sa tanang ahensiya sa gobyerno nga wa mi kalapasan. Nisalig mi nga ang tingog sa katawhan makabaraw sa ilang maniobra. Tungod sa pandemya sa Covid-19 ug sa inadlaw niyang panghudlat, napamatud-an nga wa gyod diay mi dag-anan.
* * *
Gibasura sa House of Representatives ang aplikasyon sa renewal sa prangkisa sa ABS-CBN tulo ka tuig ang nilabay kay wa magpadiktar sa Malakanyang sa iyang mga balita ug komentaryo. Mahimong ibasura sa House ang prangkisa sa SMNI sunod buwan tungod sa pagpangahas pagsaway ni Romualdez.
May gamay hinuong kalainan ang duha ka plataporma: Ang ABS-CBN nipili sa pagbarug para sa independente nga pagpanibya; samtang ang SMNI nagpagamit sa pagsangyaw sa pekeng mga balita ug pataka nga mga pasangil ug isip turutot sa laos nga politiko nga di pang kadawat nga duna nay bag-ong mga hawod.
* * *
- Latest
