Kadaugan

Gibasura sa Cebu City Prosecutor's Office ang kasong pagpanulis batok sa gitumbok nga utok sa pagtulis sa Oro Sugbu Pawnshop nga si Jigger Geverola tungod sa kakuwang sa ebidensiya.

Sa resolution nga gipagawas sa prosecutor's office nga gipitsahan og Disyembre 14, 2023, gimando ni Assistant City Prosecutor Misty Leah Escolar-Hupp nga pagawson dayon sa prisohan si Geverola. Tungod niini nakagawas na sa prisohan si Geverola niadtong adlaw nga Lunes, Disyembre 18.

Gumikan sa maong kalamboan giingon sa tigpamaba sa Police Regional Office 7 nga si Lieutenant Colonel Gerard Ace Pelare nga ila pa nga palawman ang ilang imbestigasyon sa kaso ni Geverola ug manghipos og dugang ebidensiya batok niini ug kun makahipos na sila og dugang ligon nga ebidensiya ila dayon kining pasakaan pagbalik og kaso tungod kay ang pagbasura sa sa piskaliya sa iyang kaso wala magpasabot nga dili na siya mapasakaan pag usab.

Giangkon ug gipasabot ni Pelare nga kuwang ang ebidensiya nga ilang gipresentar batok kang Geverola. Naay ebidensiya apan kulang sa pagkakaron. Iyang giingon nga ang pagbasura sa kaso batok kang Geverola wala kini magpasabot nga wala siyay kalambigitan sa kasong pagpanolis tungod kay may ebidensiya na sila niini apan kulang pa lang.

Dugang pagpasabot ni Pelare nga tungod sa bag-ong standard nga gisunod sa piskaliya sa pagpasaka og kaso nga  reasonable certainty of conviction  nga susama sa prima facie evidence o ebidensiya nga wala gi-rebut o gi-contradict maong igo kini nga makapabarog sa pasangil o depensa. Apan ang gihimong nga basihan sa polis sa pagpasaka og kaso kang Geverola mao ang ubos nga standard nga  probable cause based on personal knowledge of facts and circumstances.

Nabasa nako sa pagpasabot ni Pelare nga namahala ang polis sa ilang pagpasaka og kaso ni Geverola. Nagpinolis gyod. Nasayod man diay ang polis nga adunay bagong standard nga sundon ang piskaliya sa mga kasong ipasaka sa ilang buhatan nganong dili man kini ang ilang gisunod?

Ugma pang adlawa manumpa sa iyang pagka abogado si Jigger Geverola apan nakadaug na siya sa personal niyang kaso ug kortisiya kini sa mga polis.