Regulation dili closure

Ang City Legal Office miadmitir atubangan sa konseho sa dakbayan nga mihimog pakisusi sa mga reklamo batok sa Colon Night Market nga ang kadalanan di mahimong gamiton gawas sa katuyoan niini.

Ang Civil Code of the Philippines klaro nga nagkanayon nga "all public roads are beyond the commerce of men."

Sa ato pa di mahimong sirad-an ang Colon  ug bisan unsang karsada sa syudad aron himoong merkado.

Labi pa nga ang pagsirado niini makahasol sa mga motorista ug sa publiko.

Laing giangkon sa city legal office mao nga way memorandum of agreement ang kagamhanan ug ang Cebu City United Vendors Association (CCUVA) nga maoy gitugyanan pagdumala sa night market.

Way say pagtugot gikan sa konseho sa dakbayan si Mayor Michael Rama nga mopirma og MOA uban sa CCUVA.

Samtang gihatagan og gahom ang mayor ubos sa Local Government Code nga i-regulate ang paggamit sa kadalanan apan dili ni niya mahimong gamiton nga basihanan pagpasirado sa Colon. Ang Local Government Code naghatag lang og gahom sa mayor nga iregulate ang paggamit sa karsada apan wala ni maghatag niya og gahom pagsirado aron himoong merkado.

Apan bisan sa pag-angkon sa city legal office sa mga buslot sa operasyon sa Colon Night Market padayon ning gitugotan sa ilang operasyon. Ang kahasol nga namugna niini ug ang implikasyon sa ekonomiya sa tungod sa oras nga mahanaw sa mga matanggong sa trapiko diha sa down town area dili mahulipan sa kita sa night market.

Kun imong tan-awon ang nahimong income sa syudad niini labihan ra ka gamay kun itandi sa purhisyo nga iyang namugna.

Kun tinuod ang mga alegasyon nga dunay namaligya nga pribadong tawo sa mga pwesto sa night market, mas nikita pa tingali siya kaysa syudad.

Busa alang nako angayang hunongon na sa dakbayan ang maong kalihukan. Akong awhagon sab ang Office of the Ombudsman nga gamiton ang gahom niini nga mohimo og "moto propio" nga imbestigasyon pagtan-aw sa posibling anomaliya sa night market.