Panagang

Dunay mga bata nga pasul-obon og mga polseras nga kolor pula. Sulod ning maong polseras ang nagkadaiyang mga pinulbos nga butang lakip na ang mga orasyon.

Ang tumong ug tuyo niini mao man nga kinahanglang mapanalipdan ang bata gikan sa mga buyag ug uban pang makadaot.

Ang labing simang mao nga human sa seremonyas sa bunyag gihimo pud dayon nila mga patuo tuo sama sa paglumba kun kinsay makauna og gawas gikan sa simbahan o kapilya ba kaha.

Problema kaayo kining maong balansayon gumikan ning mosunod nga mga hinungdan:

a. Wala ta masayod sa gisulod ning mga pula nga polseras. Usahay luyo sa atong kasayuran dunay mga sulat o mga yamyam nga gipataban.

b. Nahikalimot kita sa buhing kamatuoran nga ang Dios lamang ang atong matuod nga tigpanalipod gikan sa bisan unsang matang sa kadaut ug nga ato naman hinuong giangkla ang atong seguridad ngadto sa polseras ug habak.

c. May presyo kini ug usahay mahal pa.

d. Dunay attached sipirit ang matag anting anting ug proteksiyon sama sa polseras ngadto sa mga bata. Ang uban kanila mas magkasakit naman hinuon.

Pahimangno sa mga apohan ug mga ginikanan nga kun mahimo mas makaayo nga dili kita magsalig ning maong mag butanga.

Kun magkasakit sakit ang atong kabataan mas makaayo kun atong i-exhaust ang tanang medical explanation pinaagi sa tabang sa doctor inubanan pag-ampo ug hustong paggamit sa mga sakramento.

Kay dili mahitabong sagolon ang bisan unsang sagrado sa bisan unsang pagano.

Si Kristo lamang ang matuod nga panagang ug taming gikan sa mga dautan.

Ang mga sakramento agianan sa mga grasya ug ang mga sacramental nahimong extension sa mga sakramento.