Dugang mga buaya?

Aron kuno masiguro ang mas maluntarong mga programa sa gobiyerno gikinahanglan ang mas taas nga termino sa mga piniling opisyal gikan sa presidente hangtod sa mga local government units.

Tinguha ni sa giilang "Bad Boy" sa pilikulang Pilipino kaniadto nga karon usa na ka senador---si Robinhood Padilla.

Giduso ni Padilla nga dili lang economic provisions ang usbon sa atong Batakang Balaud kon dili lakip na ang political provisions.

Iyang sugyot nga lugwayan ang ilang mga termino. Gawas niini buot pa niyang himoong 54 ang mga Senador gikan sa kasamtangan nga 24.

Matud niya nga ang 24 magpabiling national ang scope samtang ang madugang pilion gikan isip representante gikan sa mga distrito.

Sigun sa sugyot ni Padilla ang termino sa presidente ug bise presidente himoon na nga upat ka tuig apan tugotan sila nga makapasubli inay nga usa ra ka termino nga dunay gitas-on nga unom ka tuig.

Silang mga senador lugwayan sab og hangtod sa walo ka tuig gikan sa kasamtangang unom ka tuig ug tugotan nga makapasubli og laing usa ka termino.

Ang mga kongresista ug ubang lokal nga mga opisyal gawas sa barangay himuon na nga upat ka tuig ang matag termino ug tugotan nga makapasubli hangtod sa tulo ka termino.

Alang ni Padilla ang pagpunay og ilis-ilis og mga lider maoy usa sa mga hinungdan nga pobre ug way maayong kalamboan ang atong nasud.

Sayop, dili ang pagpunay og ilis og lider ang hinungdan nganong kabos ang atong gobiyerno.

Ang mga kurakot ug mapahimuslanong mga politiko lakip na sa mga way hibangkaagan nga napili sa pwesto maoy hinungdan.

Kun nakamatikod mo, sagad sa labing pobre nga mga dapit sa atong nasud gikontrolar sa usa lang ka pamilya sud na sa taas nga higayon.

Ug sagad sa malamboon nga mga dapit sa atong nasud mao kadtong lainlain ang mga nagdumala.

Wa sab kinahanglana ang dugang mga senador nga magrepresentar og distrito tungod kay duna nay mga kongresista. Gawas nga dugang ni nga gastohan, posibling managhan pa og samot ang mga buaya sa gobiyerno!