Way access road?

Luoy kaayo tan-awon ang dapit sa Sitio Santa Maria, Barangay Pusok, Lapu-Lapu City nga naigo sa dakong sunog kaniadtong Martes kay mga 600 ka kabalayan ang naugdaw.

Daplin sa dagat ang maong dapit nga nahimutangan sa gatusan ka panimalay nga nangasunog. Gitutokan gyud nako sa pag-ayo ang maong lugar ug mora’g wa gyuy access road.

Kon duna man tingali karsada, basin og maguwang lang sa “dalan-dalan” nga maglisud pag-agi ang mga sakyanan, ilabi na ang mga fire trucks, mao nga wa dayon mapawong ang sunog.

Tingali ang nahitabo nga sunog sa Pusok, Lapu-Lapu, mahimong kapanaminan sa mga opisyal sa kagamhanan nga kinahanglan gyud ang access road sa mga residential areas.   

Tan-aw nako, dili baya gyud kay mga gagmay ang kabalayan nga nangasunog, kay mga sementado man gani ang groundfloor ug ang mga bungbong sa silong.

Alang sa mga opisyal sa lainlaing Homeowners Association, siguroa gyud nga dunay access road nga kaagian sa mga sakyanan, ilabi na ang mga fire trucks.

Ayaw ninyo ipasuwabi ang kahakog sa pwesto nga hasta ang mga karsada gamiton aron ipalapad ang inyong mga balay kay basin og moabot ra ang panahon nga magmahay ra mo.

* * *

Nahimong kontrobersiyal ang awhag sa pangulo sa Disaster Risk-Reduction and Management Office sa Lapu-Lapu City ngadto sa publiko nga dili unta mohatag og donasyon alang sa mga nasunogan kon kini mga ginamit na nga sinena.

Matud pa sa gipublikar nga post sa social media, “No used clothing please. Dili modawat og used clothing ang evacuation center. Sa mga nag-organize og relief campaign, dili mi modawat og used clothing. Mas maayo bag-o. Mga biktima sa sunog dili basurahan.”

Nag-awhag sab nga mas labing maayo kon ang donasyon mga pagkaon lang, apan dunay pakapin nga ang angay’ng ihatag nga pagkaon sama sa “Fried chicken, adobo, lumpia, bolabola ug uban pa.”

Daghan tawon ang nakasulti og mga pagsaway sa mga nasunogan kay nagtoo man sila nga ang nagsulti niini mao ang mga biktima sa sunog. Atong klarohon, dili tawon ang mga nasunogan maoy midemanda niana.

Para nako, dili baya maisip nga mora’g basurahan na lang ang mga nasunogan kon hatagan sila og donasyon nga mga “used clothings” kay dunay mga ginamit na nga sinena nga mga maayo pa.

Pananglit ako, duna koy mga branded nga T-shirt ug dili na ko gusto mosul-ob, mahimong ihatag na lang nako, apan kay dili man kaha nila dawaton, dili na lang.

Kon akoy pasultihon, way problema kon ginamit na nga sinena basta limpyo lang ug dili usab dunot, way mga gisi, ug dili bulingon.

Dili man sila makapanglaba dayon ang nasunogan, busa basta limpyo lang dawaton lang nato.