EDITORYAL - Kinasingkasing nga pagtabang

Nagkainahanglan og mga hinabang ang mga nasunogan sa Barangay Pusok sa Dakbayan sa Lapu-Lapu para mapadali ang ilang pagbangon gikan sa katalagmang nahiaguman.

Apan ang pangulo sa City Disaster Risk Reduction Management Office Nagiel Bañacia mihangyo sa mga tawong gustong modonay nga dili mga ‘used clothing’ ang idonar. Basta ‘used clothing’ raba ang hisgutan ang mosantop sa hunahuna sa tawo mga ukay-ukay ra gyud. Ang ukay-ukay mga ginamit nga mga sinina gikan sa laing nasud nga gipamaligya karon sa mga tindahan.

Apan kung buot huna-hunaon ang “used clothing” wala man nagpasabot nga ukay-ukay ra gyud. Kana diay mga sinina nga pinalit gyud nga brand new gikan sa tindahan unya gipul-an na ang tagiya og suot, dili man kana ukay-ukay apan sa gihapon “ginamit na.”

Kaning kang Bañacia wala man siguro nagpasabot nga iyang gitamay ang ukay-ukay o mga tawong gustong motabang nga ang ikahatag mga ginamit na nilang sinina sa balay.

 Apan ang nakabati lang sa iyang post sa Facebook nga gikutlo sa sibyaanang DyLA ang mga pulong nga “mga biktima sa sunog dili basurahan.”  Anhing dapita medyo niulbo ang kaspa sa mga netizens, kay murag wala sa lugar, ilabi na karong mga panahona nga kinahanglan kaayo og dinaliang hinabang mga biktima unya ang tanan dili sab tubig-tubigan o kwartahan.

Sa mga gustong motabang pinaagi sa paghatag og mga gamit nga , dili man tingali basurahan ang ilang pagtan-aw sa mga biktima sa sunog kondili mga tawong nagkinahanglan og dinaliang tabang kutob sa unsay ilang matampo. Samtang maayo nga tanang donasyon anha gyud iagi sa evacuation center aron mas dunay sistema ug mabahin og maayo ang mga hinabang, kaning mga ‘used clothing’ pwede ra tingaling direktang personal nga itunol ngadto sa mga biktima.

Wala man tingali balaod nga nagdili sa mga tawo pagtunol og hinabang sa mga biktima sa katalagman.

Kinaiya baya sa mga Pilipino nga motabang bisan sila mismo tabangunon. Mao nga dili gyud kalikayan nga duna gyuy mga hinabang nga bisan og dili brand new ilang matunol, kinasing-kasing man ang ilang intension nga makatabang.