BSP Camp

Nasuroy ko g balik sa BSP Camp sa Barangay Kalunasan niadtong miaging adlaw human sa taas nga higayon nga wala ko maagi sa maong dapit.

Uban nako akong iro sa jogging sayo sa buntag dihang nakahuna-huna ko nga adto sa BSP Camp mag-ehersisyo sanglit presko ang hangin tungod kay daghang kahoy ang maong dapit.

Dako na og kausaban ang BSP Camp kun itandi niadtong panahon sa akong kabatan-on.

Ang BSP Camp nahimong dakong kabahin sa akong kabatan-on isip usa ka Boy Scout dihang nagtungha pa ako sa High School.

Matagtuig adto himoon ang nagkalain-laing kalihukan sa scouting sama sa camping  ug uban pa nga samang kalihukan.

Nindot ang maong dapit alang sa daghang mga kalihukan sama sa training sa mga batan-on sanglit dunay swimming pool, dunay dako nga jamboree hall ug lapad nga arena.

Apan nasubo ko sa akong nakita sa imaging adlaw tungod kay wala na ang dako nga jamboree hall.

Giguba ni sa bagyong Odette. Guba na sab ang mga sub-camps sulod sa lapad nga BSP Compound ug sirado na ang swimming pool.

Makita kaayo ang timailhan nga napasagdan ang BSP Camp. Gani labihan ka hugaw sa palibot nga duna pay mga basura nga nagpasad. Dili ko sigurado mga Boy Scout ba maoy nagbilin sa maong mga sagbot o mga tawo nga nag-jogging o nisuroy sa maong dapit.

Apan nakapaniguro ko nga wala pa iabandonar sa BSP ang maong dapit sanglit duna pay mga buhatan diha sulod sa BSP Camp.

Nalimtan nalang gyud tingali sa nag-akupar sa maong luna ang kamahinungdanon sa pagmintinar niini labi pa sa paglimpiyo sa palibot.

Kun dili mamintinar sa BSP Cebu Council o kinsa may responsabli sa pagdumala sa BSP Camp ang maong luna maayo tingali nga i-uli ni ngadto sa kagamhanan sa Probinsiya sa Sugbo aron matagad og husto.

Mas mapuslan pa tingali ni og tarong kun mahinayon ang plano kaniadto nga himoon ning eco-tourism site.