Diwatahan

Ang atong mga katigulangan kaniadto ug gani bisan karon naanad na gyud ning balansayon sa pagdiwata. Ang pagdiwata usa man ka ritwal diin ang diwatahan mohalad og mga halad alang sa kalinaw ug pasalamat sa mga engkantohanon nga anaa sa kalikupan labina gyud tong anaa sa mga kaumahan.

Usa kini balansayon diin himoon ang paghalad alang sa kalinaw sa pagsugod pa lang daan sa tingpugas aron malikay sa dangan ug walay kadaut nga mahitabo sa mga pananom.

Ang buhaton nila mao nga mag-ihaw og manok o dili ba kaha baboy kasagaran ugis ang bulok niini, Sa dihang ihawon na ang manok o baboy himoon nia ang pagbisibis sa dugo niini ug paghalad sa mga bahin niini sa uma o bisan asa. Wala kini asin.

Ug matud pa anha na kini lutoon kun momando na ang diwatahan. Ug bahin bahinon kin isa mga nanambong. Sa pagluto niini anaa nay templa nga asin. Ang mga engkanto dili ganahan sa asin. Himoon na usab kining maong ritwal labina kun dunay masakit kay lagi nakasaghid o nakasala ang mortal ngadto sa mga elemental. Gitawag kini og peace offering. Sa laing bahin mohimo na pud sila og susamang ritwal sa panahon sa ting-ani. Ang diwatahan manangpit sa mga Espiritu sa nagkadaiyang direksiyon ug luna sa kalikupan alang sa usa ka kasaulogan.

Kining maong akto nakapahatag sa mga elemental og dakong kalipay sanglit giila man ang ilang presensiya. Ang padugo nga nahitabo usa man ka timaan sa pagkonsagrar sa maong dapit ngadto sa mga elemental kining maong pag-ila ug padugo maoy nisilyo sa maong kalambigitan diin gihatagan sa tawo og katungod ang mga elemental sa pag-angkon sa dapit ingon nga ilang teritoryo butang nga nakapadasig sa mga paranormal nga mga kalihukan ug panghitabo, Ang nakadaut mao nga kasagaran sa nagbuhat sa ingon mga katoliko pa gyud intawon. Unsay angay buhaton? buhaton kining mosunod:

1.  Pagkumpisal

2.  Renouncement kun ang pagsalikway sa maong balansayon

3.  Pagpaingkawas sa maong dapit pinaagi sa prayer of deliverance o exorcism aron mapalagpot ang Espiritu sa occult ug divination.

4.  Pagbendisyon niini ug pagkonsagrar niini ngadto sa Dios nga maoy tinud-anay nga tag-iya sa tanang butang ning kalibutan.

Hinumdomi nga dili tinuod nga dunay peaceful co-existence sanglit ang bugtong tumong ug tuyo sa mga elemento mao lamang ang paghasi ug pagdagmal sa mga anak sa Dios nga mao kita.