Way kaikog

Labihan naba ka delikado ang kahapsay ug kalinaw sa dakbayan sa Sugbo aron mangayo og bulletproof ug bombproof nga sakyanan si Mayor Michael Rama?

Kun ingon niini na diay ka delikado ang atong kahimtang sa pagkakaron, unsa may iyang gihimo aron pagsulbad niini?

Nganong inay dia siya sa dakbayan aron pagsulbad sa problema nakaako man siya sa pagbiya og dugay alang sa pagbakasyon uban sa iyang pamilya samtang namiligro diay ang siguridad sa iyang mga molupyo dinhi sa dakbayan?

Nangutana ko niini tungod kay tinguha man ni Rama nga mopalit og mahalon nga sakyanan isip iyang service. Wala pa makontento nga P6, 583,931.04 ang kantidad sa SUV nga iyang paliton, tinguha pa gyud niya nga himoon kini nga bulletproof ug bombproof nga mogasto og dugang P3.4 milyones.

Sa kinatibok-an mokantidad og P10, 034, 931.04 ang sakyanan nga gusto ni Rama. Ug nakatag-an mo, atong buhis iyang gamiton aron ipalit sa iyang luho.

Tataw ang kamanduan sa Department of Interior and Local Government (DILG) pinaagi sa Memorandum Circular 2022-105 nga gidid-an ang lokal nga mga opisyal paggamit og luho nga mga sakyanan.

Apan bisan pa sa kamanduan sa DILG porsigido si Rama nga mangayo og exemption.

Kun siguridad ang rason nganong gusto si Rama niining maong matang sa sakyanan, angayan tingali nga iyang pruwebahan nga dunay hulga sa iyang kinabuhi.

Ug alang nako dili ang luho nga sakyanan gamit ang buhis sa katawhan maoy sulbad kun dili ang pagbaton og security escort.

Kuwang pa ba diay ang gidaghanon sa iyang pulis escort ug sa SWAT nga mag-abay sa iyang sakyanan mataghigayon nga siya mobiyahe?

Duna pay motorcycle escort nga mag-una aron mowaling sa mga sakyanan nga iyang agian pagsiguro nga di siya ma traffic. Dili pa ba ni igo nga pagpahimus bisan wala gani unta ni itugot sa balaod?

Kun buot huna-hunaon dili ni makiangayon sa ordinaryong mga molupyo nga matag-adlaw nag-antos sa problema sa trapiko samtang ang uban natong mga opisyal gi iskortan aron makalikay sa trapiko.

Dili ba maikog ang mayor sa mga magbubuhis nga nagkadusingot pagpangita og kasakyan paingon sa ilang mga trabaho ug pagpauli sa ilang mga panimay samtang siya magpahayahay gamit ang labihan ka mahal nga SUV nga gipalit sa buhis sa katawhan?