Daghang palpak!

Angay na tingali nga molihok ang atong kapolisan ug susihon nila ang mga security

guards nga sakop sa lainlaing private security agencies nga gipangdestino sa ilang mga kliyente apan way mga isyu nga armas.

Kon duna man gani isyu nga armas, ang uban niini giisyuhan lang og “paltik” nga gihimo gikan sa Danao, ug ang serial numbers gisundog ra sa orihinal nga armas,

nga lisensyado sa Firearms and Explosives Office sa Camp Crame.

Ang FESAGS, kun Firearms Explosives and Security Agency Group Services, maoy

ahensiya sa kapolisan nga gitugyanan sa pagsuperbisar sa mga guwardya. Matag

regional police offices dunay FESAGS.

Nahinumdom ko nga ang mga tagdumala og security agencies gitagalan hangtud ra

niadtong 1995 sa paggamit sa ilang mga paltik nga armas, ug kinahanglan na sila

nga mogamit gyud og original nga mga pusil para sa ilang mga guwardya.

Nakapanglingo-lingo ko nga nagbasa sa balita nga ang guwardya sa Oro Sugbu nga

gitulis sa mga tulisan kaniadtong Sabado, wa diay isyuhi og armas.

Ang guwardya sa Oro Sugbu mitug-an sa kapolisan nga sa bag-o pa siya nga

gidestino, giisyuhan siya’g 38 kalibre nga paltik revolver, apan gubaon ug way bala.

Pastilan, kon tinuod man ang gisulti sa guwardya, dako og tulobagon niini ang

security agency, ug maingon usab nato nga manubag usab ang tagdumala sa jewelry

store.

Unsaon man tawon pagsukol sa guwardya kon dunay manulis nga wa man siya’y

armas? Aw bisan pa og dunay armas apan paltik nga gubaon, mag-unsa man?

Way laing mahimo ang guwardya gawas sa paghapa, ug nagkurog sa kahadlok kay

bisan og wa na ang mga tulisan nagpabilin gihapon kini nga naghapa.

Kamong mga tagdumala og mga security agency, ayaw mo pagpatuga-tuga og tukod

og ahensya sa mga guwardya unya kuwang mo’g armas. Nagpakauwaw lang mo.

Maayo lang mo mokubra sa sweldo sa guwardya gikan sa inyong kliyente, ang uban

pa kaninyo mokuha og subra sa 20 porsiyento nga mao ra’y unta ang gilatid nga

ibanon sa contract amount.

Unya, kamo sab nga tagdumala sa Oro Sugbu, mangutana ko kon nganong ang

tanang sudlanan sa inyong mga alahas display ra man kaayo?

Sa uban baya nga baligyaanan og mga alahas, kon motan-aw ka sa magustohan

nimong alahas, mangayo pa og yawe sa store in-charge aron buksan ang cabinet.

Pero kadtong mga tulisan nga namupho sa mga alahas, yano ra kaayo nga namunlot

sa mga sudlanan sa alahas gikan sa estante.

Kon gikandadohan pa unta kadto, ug ablihan lang kon adunay motan-aw nga gustong

mopalit, maglisud ang mga tulisan sa pagpanguha sa mga alahas.

Kadaghang palpak!