Leksyon ang nahitabong tulis

Husto ang sugyot sa usa ka sakop sa media nga kinahanglang mogamit ang mga financial establishments og automatic lock nga pultahan aron kon may pagpanulis dili makaabli dayon ang mga tulisan, ug posible nga masakpan.

Apan tingali sab, dili ra gihapon magsilbi bisan pa og mogamit og automatic lock ang mga bangko ug pawnshop kay patyon man nila ang mga kawani kon dugay kini moabli.

Ikaduha, sagad sa mga pawnshop ug baligyaanan og mga alahas, abli gyud kanunay ang pultahan kay kon sirado kini pirmi, pila ra tingali ka kustomer ang mosu’d.

Sayon ra kaayo nga nakasu’d ang upat ka tulisan, duha niini nagbitbit og high-powered nga armas, sa usa ka baligyaanan og alahas sa Colon Street niadtong Sabado sa buntag.

Ang nagbinugtong nga guwardya baligyaanan og alahas, wa gyud makasukol ug nagkurog sa kahadlok. Gani, bisan wa na ang mga tulisan, nagsigi gihapon og hapa ang gwardya.

Nahadlok sab ang gwardya nga mosukol kay 38 kalibreng revolver ra ang iya, unya sa mga tulisan high powered nga armas, ug upat pa sila.

Kini maoy rason nga gipasagdan ra niya ang mga tulisan nga mipupho sa mga alahas sa gibantayan niyang baligyaanan og mga alahas.

Maayo kay dunay CCTV ang maong tindahan ug nakita gyud kon giunsa sa mga tulisan paghimo ang pagpanulis. Apan ang nahitabo nga pagpanulis, magsilbi unta nga leksyon.

Kinahanglan nga shotgun gyud ang iisyu nga armas sa gwardya nga magbantay sa mga bangko ug baligyaanan og mga alahas, ug kinahanglang labing menos, duha ka gwardya.

* * *

Mga pito ngadto sa walo ka tulisan ang nalambigit sa maong pagpanulis sa baligyaanan og mga alahas sa dalan Colon niadtong Sabado.

Duha ang misu’d og namupho sa mga alahas, ang duha nga armado og high powered firearms nagbantay sa pultahan, ang tulo mga driver sa tulo ka motor nga gisakyan nila pag-ikyas, ug may driver pa nga nagmaneho sa awto nga pula.

Ang awto maoy nagsunod sa mga tulisan nga miikyas ug pag-abot sa unahan, nanaog ang usa sa mga tulisan gikan sa iyang gisakyan nga motor nga nagbitbit sa mga bag nga gisudlan sa mga alahas, ug misakay sa pula nga awto.

Way swerte kay ang plate number sa awto nakuha sa CCTV nga ilang nalabyan ug maoy gihimong giya sa kapolisan sa pag-follow up sa kaso, ug may duha dayon nga nadakpan.

Ang ubang netizens mikumentaryo nga angay kuno nga todason na dayon ang maong mga tulisan. Para nako dili maayo mentras wa pa sila mapamatud-i gyud.