Mora’g kilat nga lihok sa mga tulisan

Mora’g nag-shopping ra ang mga tulisan dihang ilang giransak ang usa ka pawnshop and jewelry shop sa Colon sa dakbayan sa Sugbo niadtong adlaw'ng Sabado diin gilimas nila ang tanang alahas nga sulod sa mga estante sa naasoy'ng tindahan.

Nahitabo kini alas otso sa buntag, pastilan walay pagpanagana ug walay kahadlok ang mga tulisan nga nihimo sa pagpanulis sa usa ka tindahan og mga alahas sa dakong syudad nga gitinguha nga mamahimong Singapore-like.

Angayan na ba kita nga maalarma niini nga dili gyud kini bastabasta nga paghimo sa krimen nga nahatagan og dakong kasayon. Nilampos sila sa pagpanulis sulod lang sa pipila ka minutos nga murag kilat ang lihok.

Asa man gyud ang dunay buslot ani? Atong unahon ang establismento mismo diin aduna man daw mga gwardiya pero walay armas, unsa man ang ilang gamiton sa pagpanalipod sa mga tulisan ang ilang tudlo? Sobra kaayo ka kompiyansa ang pawnshop nga humot man unta kaayo sila sa mga mata sa mga kriminal.

Kanang for compliance lang ang security measures nga gipatuman basta lang gud ingnon nga naay gwardiya payts na ilad-ilad lang kong naay maghunahuna nga manulis, ug natinuod man ug wala sila makapanagang. Wala usab dayon sila nakataho sa kapolisan nga duol ra man unta sa mga police stations kanang dapita, unta nakaresponde dayon ang mga otoridad ug posibleng nadakpan pa ang mga kriminal.

Mora'g pamilyar ang mga tulisan sa ilang gihimo kay na-execute nila kini nga limpyo ug paspas kaayo. Posibleng gitun-an nila daan o ba kaha naa silay insider nga maoy yawe sa ilang malamposon nga pagpanulis.

Usa kini ka dakong pahigmata sa tanan nga mga negosyo kay naa na gyud diay sila sa palibot nga nagpaabot lang kanus-a makakita og tsansa dayon moatake na.

Sa atong kapolisan, duna ba kaha silay pagkuwang ilabi na sa intelligence gathering nganong wala man nila matiktiki kini. O nalutsan lang gyud sila kay bisan unsaon nila og bantay mas mangita gyud og pamaagi ang mga kriminal nga malipat ang mga tinugyanan sa balaod.

Mas palig-onon pa gyud ang koordinasyon sa katawhan kay sila ang mga mata ug dunggan nga motaho sa mga tinugyanan sa balaod aron masanta ang krimen ug madakpan ang mga kriminal.

Ako dili mobasol sa mga pulis kay gihimo nila ang tanan apan nataymingan lang gyud nga dunay nakalusot. Hinaut unta nga mahatagan kini og kasolbaran pinaagi sa pagkasikop niining mga tulisan nga naghamok sa dakbayan.