Kahimanan sa komunikasyon

Creative kaayo ang mga dautan labina diha sa pagpahamtang og tunglo o maldisyon ngadto sa ilang mga biktima. Asoy pa sa mga karaang mga eksorsista mahimong hasion ang mga biktima pinaagi sa mga kahimanan sa komunikasyon lakip na niini ang telepono. Dunay motawag gabiing dako ug kun tubagon sa hingtungdan dili sila motingog. Kun motingog man gani, ang tingog kasagaran guttural ug makahahadlok. Magbalik balik kini hangtud nga ang biktima maputos sa kalisang labina panahon sa kagabhion.

Ning atong kapanahonan karon atong nakita nga daw nagkadiyotay ang nigamit sa telepono nailisan na kini kasagaran og cellphone. Ang komunikasyon dili lang kutob sa tawag ug a text kay apil naman niini ang social media ug internet.

Gigamit usab kini nga kahimanan sa dautan aron paghasi sa mga tawo. Nahinumdom ko nga niadtong batan-on pa kong pari dunay batan-on nga ni enroll sa iyang kaugalingon sa Online School of Mediumship. Magyampungad siya sa laptop gikan gabii hangtud alas tres sa kaadlawon.

Kadto ang sinugdanan sa iyang possession. Dugay kaayo ang kalingkawasan sanglit daghan pa kaayo siya og angayan nga i-renounce. Salamat ni Anhing Monsenyor Fred natabangan gyud tawon ang batan-on. Ako siyang gi refer human nako ma-diagnose ang iyang kahimtang. Dili full time akong pag-atiman tungod kay assistant raman ko ug daghang trabaho ang gihatag ngari Kanako sa akong kura.

Anaa pud ang mga online games nga matawag natong diabolic lakip na niini ang ML nga nakakalas sa kinabuhi sa mga batan-on, makaguba sa relasyon ug maka buryong sa hunahuna sa mga tawo.

Naa pa tong Momo Challenge nga creepy kaayo ug matud pa daghan na ang naghikog gumikan ning maong duwa. Ang Pokemon kun Pocket Monster nga duwa naghatag og daghang mga disgrasya sa nisalmot niini.

Angayan kitang magmatngon ug hamtong diha sa paggamit sa atong kahimanan sa komunikasyon kay kun nagkugi kita sa pagpakaylap sa maayong balita ang mga hinanib ni Satanas nahimong busy usab sa pagpakaylap sa ilang Malala nga tunglo ug kadautan ginamit ang mga kahimanan sa komunikasyon. Ang atong himoon mao nga: “Think Before You Click!” bantayi ang inyong mga anak ug susiha sila matag karon ug unya kay sila man ang target sa mga demonyo karong mga panahona. Retro Vade Satana! Paahawa Satanas!