Ambisyon sa gahom

Dili na matago ang pagkasiak sa  Unity Team  nga maoy responsabli sa makabungog nga kadaugan sa tandem nilang Presidente Ferdinand Marcos Jr. ug Bise Presidente Sara Duterte.

Dayag ug tataw ang mga senyales sa mga kausaban sa alyansa sa politika didto sa Kongreso. Ang labing awahing kalamboan sa House of Representatives diin duha ka mga sakop sa mayoriya ang misuporta sa panawagan nga tugotan ang mga prosecutors sa ICC nga imbistigahon ang kampanya batok sa illegal nga drugas sa imaging administrasyon usa lang sa mga di matuis nga mga timailhan. Sila si Kongresista Benny Abante sa sixth district sa Manila nga maoy chairman sa committee on human rights ug 1-Rider Partylist Rep. Ramon Rodrigo Gutierez miduso sa House Resolution 1477 nga nag-awhag sa administrasyong Marcos pagkooperar sa imbestigation sa ICC batok ni kanhi Presidente Rodrigo Duterte. Una ning higayon nga dunay mga sakop sa majority bloc nga nihimo sa maong panawagan.

Una niini mao ang pagtangtang sab sa House sa confidential fund sa buhatan sa bise presidente ug sa Department of Education (DepEd) diin si Sara maoy secretary.

Sa mga nanghitabo sa Kongreso di sab matago ang mga kamot ni House Speaker Martin Romualdez.

Kun nakabantay mo nagsugod ang pagsiak sa ilang alyansa dihang gitangtang si kanhi president Gloria Macapagal Arroyo isip usa sa mga senior deputy speakers sa House. Si Arroyo suod nga higala ug kaalyado sa bise presidente hinungdan nga, isip reaksiyon, miluwat si Sara isip sakop sa Lakas.

Tungod kay giipit ang budget sa iyang anak ug gihulga pa ron nga i-impeach, natural nga milaban ang kanhi president. Ug mao ni klarong hinungdan nganong dunay ingon niini nga lakang sa Kongreso sa pagkakaron.

Kun atong sumpayon ang  kutay sa mga panghitabo, tataw nga ang hinungdan niining tanan mao ang naghingapin nga mga ambisyon sa gahom. Si Sara maoy labing dakong hulga sa ambisyon ni Romualdez nga mamahimong sunod nga president sa nasud.

Busa dili na ko matingali og usa niining mga adlawa dunay kongresista nga moduso og articles of impeachment batok sa bise presidente. Di sab ko mahibulong og magkadaghan pa ang mga kongresista nga kaalyado sa administrasyon nga mopaluyo sa panawagan nga tugotan ang ICC nga mohimo sa ilang imbistigasyon batok sa kanhi administrasyon.

Ang pangutana hangtud kanus-a barugan sa presidente ang  ilang panaghigala sa mga Duterte? Unsa man kahay mas bug-at sa presidente inig-abot sa panahon nga kinahanglan na siyang mamili tali sa higala ug kadugo?