Bise presidente dili interesadong mag-presidente

Sukad pa niadtong 2022 nga panawagan sa mga nagpakabanang sosiyedad, kinsa nagmotorkada-parada sa kadalanan uban ang singgit:

 “Run for president, Sara, run!”, giklaro na daan ni kanhi Davao City Mayor Sara ‘Inday’ Z. Duterte-Carpio nga kontento na siya sa pagpangalagad sa naasoy'ng siyudad, diin sa iyang pagpaningkamot nahimong one of the cleanest cities all over the world, insurgency-free ug debt-free nga maoy nakapahigugma-nakapahanga sa katawhan kaniya.

Gani, makatandog! Kadtong laing panawagan sa taga Luzon, Visayas ug Mindanao nga nagahangyo sa taga-Davao nga mahimo bang hulaman nila si Inday aron makatilaw sab sa ilang natilawan ang tibuok nasud?

Gisubli pagbalibad ni Inday ang maong kalanog. Apan tungod kay misamot man hinuon kasipa ang tingog sa katawhan, kinsa nagtinambayayongay aron ituboy gayod si Inday sa pagka-pangulo sa nasud, nadutlan ang manggiluy-ong inahan.

Oo, misugot siya. Pero, pagka-bise presidente lang. Diin, sa ilang panag-tandem ni Bongbong Marcos (BBM), si Inday misaad nga suportahan ug irespeto niya ang pagkatawo ug mga desisyon ni BBM kon sila maoy modaog. Ug tuod man, iya kining gituman.

Bisan, gitraydoran na siya ni House Speaker Martin Romualdez, ig-agaw ni PBBM, kang kansang linihokan morag mas labaw pa sa presidente, bisan ang mga kanhi tarong cabinet members gipulihan ni PBBM og mga hiwi, kinsa maoy hinungdan nga namalik na pod karon ang pagharihari sa mga dilawans-pinklawans, nagbahang illegal drugs, makalilisang krimen, korapsiyon ug uban pa, diin maoy target nga papason ang mga Duterte sa ilang dalan, si Inday nagpabiling loyal ni PBBM.

Sama ni Hesukristo nga atong Manunubos, bisan giunsa siya paglatigo-kastigo sa mga Hudas ug ka-Hudeyohan, nagpabilin ang iyang kaluoy ug gugma sa pagpangalagad sa katawhan.

Apan samtang mi-concentrate si Inday sa iyang trabaho, si Martin, nagsige sab og pamolitiko. Kay gustong mag-presidente inig ka 2028, gipunayan niya sa pagpaggun-ob ang nindot imahe ni Inday.

Hinungdan, sa miaging Nobiyembre 19, 2023, atubangan sa mainstream ug social media, gipahibalo ni Inday nga dili siya interesadong molansar pagka-presidente sa 2028.

Usab, si Tatay Digong mibandilyo. Klaro man gyong modagan pagka-presidente si Martin, iyaha kuno kining ipangampanya-suportahan. Awhagon niya tanan, nga pabotaran kini!

Suwerteha ni Martin, sa?  Pero yuna, suwerte gyod kaha?