Snatchers namalik na!

Angay’ng mag-inabtik ang atong kapolisan karong panahona kay mibalik na sab ang mga snatchers ug mga tulisan.

Nakakita ko sa video nga gi-upload sa social media nga gilabnihan sa iyang kwentas ang usa ka pasahero sa bus diha sa Natalio Bacalso Avenue dapit sa eskina V. Rama Avenue.

Sayon ra kaayo sa snatcher ang paglabni kay naghunong man ang bus kay grabe kaayong trapika dihang dapita. Gilukso lang niya diha sa may bintana sa bus, ug dayon labni.

Dinhi nga gimingaw ko sa mga sakop sa Hunter’s Team kaniadto nga maoy mihimo’g lakang batok sa mga badlongon sa katilingban.

Awhagon nako ang akong amigo nga si Koronel Ireneo Dalogdog, ang hepe sa kapolisan dinhi sa Cebu City, nga palihug sir, padestinohi og mga polis dihang dapita.

Unya kon may masakpan, kamo na ang mahibawo nga mohimo’g paagi aron nga dili magbalik-balik ang mga snatchers sa pagpamiktima.

* * *

Gianinaw gyud nako pag-ayo ang mga karsada dinhi sa Cebu City, Mandaue City, LapuLapu City ug sa silingan natong lungsod sa Talisay ug Minglanilla.

Pulos gyud nakasinati og grabeng traffic ang maong mga lugar. Sa maong mga dapit nga atong gihisgotan, way mga construction sa BRT project nga gihimo, apan traffic gihapon.

Diha ko nakaingon nga ang problema sa grabeng traffic nagumikan kay hilabihang daghana na gyud sa mga sakyanan karong panahona.

Puno ang tanang mga karsada sa mga sakyanan, ilabi na panahon sa “peak hours” buntag ug sa hapon. Aw, bisan gani sa udto puno-puno man gihapon ang mga karsada.

Dinhi ko nakaingon nga ang problema sa traffic tungod kini sa kadaghan sa mga sakyanan ug mga daghan pa sa atong mga karsada ang gagmay ra.

Ang mga karsada nga giisip nga mora’g “bottle neck” mao ang diha sa M.J. Cuenco Avenue sa Hipodromo. Lapad kaayo ang Imus Road apan ang mga sakyanan nga mopaingon sa Mandaue mag-aginod inig-abot sa Hipodromo.

Ang tinuod, kinahanglan gyud nga palapdan pa ang atong mga karsada ug himoon kini nga eight lanes, tag-upat ka lane kada direction.

Apan ang pangutana, may igong kuwarta ba ang kagamhanan nga ibayad sa mga yuta nga maigo sa right of way? Dunay balaod nga nagdili sa pagkuha sa mga butang nga pribado, bisan pa og gamiton kini sa gobyierno, basta dili bayran.

Nagpasabot nga nagkinahanglan og pipila ka bilyon ka pesos ang kagamhanan aron nga makapahigayon kini og pagpalapad sa atong mga karsada.

Mao nga mentras wa pay kwarta ang kagamhanan, mag-antos usa ta sa problema sa trapiko, gawas lang kon ang gobiyerno maghimo og balaod nga dili na padaganon ang mga gubaon nga sakyanan.