Mag-antos usa ta

Ang padayong pagmugna og “exclusive lane” alang sa Bus Rapid Transit diha sa Osmeña Boulevard ug Natalio Bacalso Avenue nakamugna gyud og grabeng problema sa traffic, bisan na sa ubang mga dagkong karsada ning Dakbayan sa Sugbo.

Kada buntag, mag-aginod ang mga sakyanan nga moagi sa diha sa duol ning maong giguba nga karsada. Gani, ang V. Rama Avenue nga six-lane road, nakasinati na usab og grabeng problema sa traffic.

Kon gikan ka sa southern part sa Cebu City dapit sa Mambaling, wa kay laing karsada nga kaagian kon dili diha ra sa Natalio Bacalso Avenue, ug kon mopaingon ka sa Fuente Osmeña, ang V. Rama Avenue.

Apan miagi ko kagahapon sa buntag sa V. Rama Avenue, sus, nag-aginod ang mga sakyanan kay ang mga motorista anaa na man diha moagi. Paita gyud, kay dugay pa ra ba kaayong mahuman kining pagmugna nila og exclusive lane para sa BRT.

Sigurado ra ba gyud ko nga bisan og anaa na kining maong mga BRT, dili kini makasulbad sa traffic. Hinuon, magpabilin gihapon ang problema kay gamay na man lang ang kaagian sa mga sakyanan kilid sa exclusive lane sa BRT.

Ang tinuod, dili tanang mga dapit sa kalibotan nga nagmugna og BRT nga nagmalampuson. Ang kanhi mayor sa Cebu City maoy nangusog nga mapatuman kining BRT kay didto kuno sa Columbia malampuson ang maong transportasyon.

Kon ang karsada sa Cebu City gipalapdan pa nga susama didto sa Columbia, bisan sama na lang sa national highway sa Thailand, ug diha sa Bacolod ug Iloilo, molampus tingali.

Sayonan ka nga ang karsada nga gitagana para sa BRT mora’g tulo ka lanes, apil ang luna nga gigamit kaniadto nga center islands. Sa matag kilid sa BRT exclusive lane, anaa ang gamay na lang gyud kaayo nga kaagian sa ubang sakyanan.

Unya, ang kontraktor sa BRT Project nga gitugyanan sa Department of Transportation (DOTr), mas mipalapad pa sa exclusive lanes sa mga dapit nga anha ang mga BRT stations.

Kana diha sa Escario Street dapit sa Kapitolyo, inig liko sa BRT siguradong magka problema gyud ang trapiko. Ingna ko nga bakakon kon masulbad sa BRT problema sa trapiko dinhi sa Cebu City.

Ang makasulbad sa problema sa trapiko mao ang pagpalapad sa mga karsada, unya dili magpanuko pagputol sa mga kahoy nga nakababag sa karsada.

Unya, hugtan ang pagdisiplina sa mga driver nga magpataka lang pagparada sa ilang mga sakyanan daplin sa karsada, ug kadtong magbutang og mga makabag sa pag-agi sa mga sakyanan.