Umaabot nga trahedya sa karsada

Kini ang dayag na kaayo nga sitwasyon sa karsada sa syudad sa Naga ilabi na sa Barangay Cantao-an ug ubang kasikbit nga dapit nga moagi sa Metro Cebu Expressway. Makapakitbi sa atay tan-awon ang dagkong liki sa yuta mismo sa karsada mismo nga naabhak tungod sa paglihok sa yuta.

Gamay'ng tuklod nalang seguro kong adunay movement mobigay na ang dapit nga murag nagpaabot nalang og perfect timing magun-ob ang dapit.

Namiya na hinuon sa dapit ang mga residente human bayari ug alang usab sa ilang kaluwasan.

Apan duna pay mga tawo nga moagi sa karsda kay lagi mas duol nga murag gimarka bahala nalang ang ilang kinabuhi basta makaagi lang. Hinuon gipabantayan na ni Governor Gwen Garcia og pulis aron wala nay makaagi sa maong karsada.

Pipila ka tuig ang nalalabay dihang nahitabo ang pagkahugno sa yuta sa Sitio Sindulan Barangay Tinaan diin gilamoy ang mga pinuy-anan ug apil na ang katawhan, daghang kinabuhi ang nakalaa niadtong maong katalagman.

Hangtud karon nagbilin og kasakit sa mga tawong hingtungdan ang nahitabo nga iya sa kinaiyahan. Dinhi nato nasaksihan kon unsa ka gamhanan ug unsa usab ang mahimo niya nga kadautan sa mga tawo tungod kay kanunay naman siya nga natay-og sa way hunong pag-abusar sa kinaiyahan.

Ang Metro Cebu Expressway adunay 74 kilometros nga inig makompleto  magkakonektar na kini sa Cebu North Road sa Danao City ngadto sa Naga Uling Road sa syudad sa Naga. Magsilbe kini nga alternative north-south backbone highway sa Metro Cebu.

Nindot kaayo kini nga proyekto nga maghatag og kasayon sa pagbiyahe sa mga tawo ilabi na karon nga hilabihan na gyud ka traffic ang naandan nga karsada.

Apan gikinahanglan nga seguradohon nga luwas kini gamiton sa mga tawo ug dili maoy hinungdan unya simbako lang sa laing trahedya sa syudad sa Naga.

Samtang wala pa mahitabo ang nag umbaw nga trahedya aksyonan na kini dayon sa mga hingtungdan nga ahensya sa atong gobiyerno.