Kinsay modaog sa kinihaay?

Human mopayil og ‘red tagging’ P2M civil libel suit ang inahan ug anak, Carol ug Atom Araullo batok kang kanhi cadre sa New People Army, Jeffrey ‘Ka Eric’ Luces Celiz ug kang kanhi NTF-ELCAC USec Ma’am Lorraine Marie T. Badoy, kinsa hosts sa programang ‘Laban Kasama ang Bayan sa SMNI, diin walay hunong miladlad sa mga iladong personalidad, kinsa gitumbok nilang miyembro o nahilambigit sa teroristang grupo: Communist Party of the Philippines-New People Army-National Democratic Front (CPP-NPA-NDF), wala mahigawad ang mag-inahang Carol ug Atom sa gipakalat nilang aksiyon halos sa tanang mainstream media outlets. Kay gikalipay man kaayo kining maong isyu sa mga pro-CPP-NPA-NDF nga pulos gustong pahilomon na si Ka Eric, Ma’am Loraine ug lakip na ang SMNI.

Apan sa samang higayon, naghatag sab nila kinig sagabal sa gitinguha nilang butang nga makab-ot. Sanglit, miresbak man si Ka Eric pagpasakag P2.5M-counter charges for damages batok nila ni Carol ug Atom didto sa Branch 105, Branch 306 Regional Trial Court, Quezon City sa miaging Oktubre 24, 2023.

Matod pa ni Ka Eric, nga aron kuno modaog ang mga Araullo sa gipayil niining kasong sibil, kinahanglang ipruyba nila nga diha sa paggamit og freedom of expressions nila ni Ka Eric ug Lorraine, nahipunta kini in bad faith.

Pero unsaon man niini pagka-bad faith nga ang adbokasiya sa ilang pagsangyaw mao man ang pagpanalipod sa demokrasiya, pagkab-ot sa kalinaw ug pagpatigbabaw sa nasodnong seguridad batok sa mga daotang puwersa nga nagtinguha paggun-ob sa atong nasod. Nga sa ato pa, purely in good faith ilang ginahimo.

Gani, oras nga moabot na sa hawanan sa korte ang ilang panagkombati, paulanan kuno ni Ka Eric ang mga Araullo sa direktang mga lehitmong ebedensiyang nahuptan uban sa mga testigos nga pulos kauban ra nila kanhing mga NPA (sa wala pa mosurender sa gobiyerno) ug andam motumbok-momatuod nga ang mag-inahang Araullo parehong konektado sa CPP-NPA-NDF.

Nindot ning pagkinihaay sa mga Araullo ug Ka Eric. Kay dinhi, pinaagi sa patas nga timbangan sa hustisya, may mahukasan sa maskara ug mabutyag ang tinuoray'ng hitsura. Unya, masayran kinsa kanila ang kalaban ng bayan, ug kinsa ang nagmahal?

Unta, ang tinuod mananaog maoy padag-on.