EDITORYAL - Krimen dala sa online casinos

Ang nahitabo karon sa Pilipinas nga dunay mga krimeng gikalambigitan og mga langyaw, biktima man o ang mga nagbuhat sa krimen, dili na bag-o sa Asya.

Nahitabo na sab kini didto sa nasud sa Myanmar pito ka tuig na ang nakalabay. Una pa naabot kaning online casino operations nga gitawag karon og Philippine Overseas Gaming Operations nga gi-operate og mga Chinese gambling businessmen, nag-una na kini didto sa Myanmar partikular sa Karen State ug sa Cambodia, sa Sihanoukville.

Ilegal ang sugal didto sa China sukad sa pagkahimugso Communist Party niadtong 1949, apan kay lagi daghan man gyud nilang sugarol, ang uban nanglarga sa laing nasud ug didto gipadayon ang ilang operasyon.

Kadugayan, kining maong mga Chinese nga nahimo sab naturalized citizens sa mga nasud diin sila mibalhin og puyo, nigamit sa ilang pagka-citizen aron magtukod aning mga casinos inabagan sa mga kurakot ug mga impluwensiyadong lokal nga Burmese o Cambodian.

Aron mokita og dako, gigamit nila ang teknolohiya (internet) aron makaagni og mga Chinese nga sugarol aron pagpusta.  Tungod dili tanang Burmese o Cambodians makamao og Mandarin, Cantonese, Fukien ug uban pang Chinese nga lengwahe, nag-import sila og mga tawo gikan sa China, kasagaran nga taga probinsya.

Apan nahimo sab kining ‘magnet’ sa transnational criminal syndicates, gikan sa mga extortionist, kidnappings, pagpatay, loan sharks, rape, human-trafficking ug labaw sa tanan sindikato sa ilegal nga drugas karon nga duna silay koneksyon sa gobiyerno .

Sa paglanat sa mga katuigan, nabatyagan sa gobiyerno sa Cambodia ug sa Myanmar nga nagkaanam og saka ang krimen aning mga lugar diin mag-operate kining maong mga offshore maong ilang gipahunong.

Sa panahon sa administrasyong Duterte, gitugot niya ang operasyon sa POGO tungod sa makolektatng buhis. Apan namalhin sab dinhi kining transnational crime syndicates nga duna na karoy mga kakunsabong mga kriminal nga mga Pilipino ug posible pa nga naa sa gobiyerno ang uban sa ilang mga gisaligan.

Daghang raids nga nahitabo sa Luzon nga niresulta sa pagkaluwas sa mga Chinese nationals nga biktima sa human trafficking, dunay gi-kidnap sa kaparehas nilang Chinese, extortion,  dunay mga nangadakpan sa dinagkong ronda sa ilegal nga drugas ug uban pa.