Maguwang sa tsismis

Ambot nakabantay ba ang publiko nga sagad sa mga report gikan sa kapolisan karon maguwang nalang og dyutay sa "blind item."

Di na mohatag og mga pangan sa ilang dinakpan ang kapolisan.

Kini agi og pagtamod sa kamandoan gikan sa ilang ulohang buhatan. Ang spokesperson sa PNP nga si Col. Jean Fajardo, kinsa usa ka abogado, mipasabot nga ang ilang gihimo agi kuno og pagtuman sa Data Privacy Act.

Daghan man gud kuno og mga hitabo nga gikiha sa mga dinakpan ang kapolisan tungod sa pagpahibawo sa publiko sa ilang pangan.

Ang mga sakop sa National Union of Journalists of the Philippines (NUJP) didto sa Bacolod ni protesta niining maong polisiya.

Isip reporter nakasabot ko nga dunay mga impormasyon ang kapolisan nga kinahanglang protehian labi pa kun makadaot ni sa ilang operasyon o ba kaha nagpadayong imbistigasyon.

Dugay ko nga nag-cover sa kapolisan ug military busa nakasabot ko niini. Dunay mga sitwasyon nga di gyud mahimong ipublikar labi pa kun dunay kinabuhi nga mamiligro.

Pananglitan ang kaso sa kidnapping. Nahinumdom ko sa kaso sa usa ka langyaw nga gidagit kaniadto diin mihangyo ang kapolisan sa media nga mopatuman og news blackout hangtod nga ilang maluwas ang biktima ug madakpan ang mga kidnappers.

Bisan nasayod nami sa detalye niadtong higayona nisanong mi sa hangyo sa kapolisan tungod kay nasayod mi nga balido ang maong hangyo.

Apan di nako masabtan kining bag-ong polisiya sa kapolisan. Ilang gigamit ang Data Privacy Act aron ihikaw ang importanteng mga kasayuran ngadto sa publiko.

Wala ko makakita og kalapasan sa balaod sa pagtug-an sa pangan sa ilang mga dinakpan gawas tingali og apil na sa ipublikar ang ubang mga personal nga kasayuran.

Dunay mga higayon nga importanteng ipublikar ang pangan sa dinakpan aron mahatagan og pahimangno ang publiko. Pananglitan sa mga kaso sa pagpangilad ug illegal recruitment.

Dakong hagit ni sa mga tigbalita nga nagcover sa kapolisan unsaon nila nga padayong maserbisyohan ang publiko taliwa sa limitasyon sa mga impormasyon nga ilang makuha.

Dinhi masukod ang abilidad sa tagsa-tagsa ka reporter.