Nisayaw ang.adlaw?

Naukay ang mga deboto nga nanambong sa Pontifical Mass sa Capelinha de Fatima Replica sa Barangay Lambusan lungsod sa San Remegio dihang nakita nila ang paglihok sa adlaw. Ang maong talan-awon daling nag viral sa social media. Gani makita ang mga tawo nga nagkaway kaway sa mga kamot ug aduna usay nangluhod.

Akong giadto ang dapit niadtong Sabado ug  nahinabi ang mga tawo nga nakasaksi sa panghitabo nga gituohan nilang milagro. Ang candle vendor nga sj Adelaida Aguilar nagtulo ang luha nga giasoy ang nasaksihan niya nga nag uwan niadtong tungora apan nipakita ang adlaw ug kalit nga hayag kaayo ug nidako ang siga nga gakidlap kidlap gani mag usab usab matud pa ang kolor ug dihang adunay panganod nga nitabon ilang nakita ang panagway sa mahal nga Birhen Maria.

Mao usab kini ang gipadayag sa laing deboto nga si Victoria Ursonal kinsa nipadayag nga dili produkto sa ilang imagination ang ilang nakita, gawas pa daghang mga tawo ang nakasaksi kuno sa gituohan nilang dancing sun. Ako man gud silang giingon nga basin og nag imbento og estorya.

Akong gisulayan og hinabi ang chaplain sa Capelinha apan nagdumili sa pagpa-interview kay ang kadagkoan ra sa archdiocese ang moisyu og statement mahitungod sa nahitabo. Ang ako lang unta nga bisan sa personal point of view or bisan narratio lang sa nahitabo wala gyud motingog ang pari, samot na ang mga alagad o lay minister. Midyo nadismaya ko kadyot sa tinagdan nila kay niadto ko dili lang usa ka tigbalita pero isip usa ka deboto apan bugnaw man ang ilang tinagdan, mas maayo pa ang mga namaligya og kandila kay geniune init ang ilang paghangop namo didto. In fairness nibalibad man pud sila og tarong ang taga simbahan pero nideretso lang sila og sulod sa ilang pundohanan ug wala na mogawas. Aw ila pud na kay igo ra pud sila nagsunod sa kamandoan sa simbahan.

Pero kong ako isip deboto ako gyud ipalangyab ang akong pagtuo sa akong personal nga kapasidad, dili angayan ikahadlok ug ikauwaw ang pagtug-an sa akong nasaksihan tungod ug alang sa atong Langitnong Inahan.

Samtang adunay mga nagbiay biay sa social media kalabot sa nasaksihan sa mga tawo, ako dili ko mo-judge kay wala man ko kakita, magbuot diay ta sa nakita sa uban? kong wala ta kaadto niadtong higayona respetohon nalang pud nato ang nasinati ug nakita sa uban.

Walay makadiktar sa tawo kon unsa ang ilang gituohan, sama sa uban nga wala motuo aw ila pud walay mamugos nga motuo sila, mag respetohay lang gud.

Kong ang gituohan nga dancing sun ang maghatag og conversion sa mga tawo nga mobalik pagpaduol sa Ginoo ato nang ihatag, walay mawala nato kon motuo o dili.

Dako kaayo nga proseso ang agian aron maisip nga tinood o dili ang gitoohan sa mga nakasaksi sa giisip nilang milagro. Huwaton nalang nato kong unsa gyud ni.