Sungkaan nga karsada

Kini ang sitwasyon sa Veteran's Drive dapit sa Maracas, Barangay Lahug dakbayan sa Sugbo kong gasubay gikan sa JY Square pasaka sa Marco Polo Plaza Hotel diin naay portion sa kasada nga nabangag lawom ra.ba ug delikado kaayo ilabi na sa mga mag besikleta ug mag motorsiklo.

Gani matud sa mga nagpuyo didto nga ubay-ubay na ang naaksidente nga mga nag-motor ug nag-bike kay ma-shot sa bangag panahon sa kagabhion ug kanang mag-ulan. Panahon usab sa adlawan delikado kaayo sa mga bikers kay molikay man sila sa bangag ug bati nga karsada didto na sila mosubay sa lane sa mga dagkong sakyanan delikado nga mapunggit sila.

Nagsugod kining suliran sa karsada atol sa pagpatuman sa proyekto sa Metro Cebu Water District.kon MCWD diin gikalot ang karsada kay gipaagi ang mga dagkong tubo sa tubig gikan sa Lusaran water source aron usab mapalambo ang serbisyo sa mga konsumidor nga nakasinati sa kanihit aa tubig.

Nahuman naman ang proyekto ug gitabunan ang mga bangag apan nangaukal man ang semento sa kakusog sa bul-og sa tubig baha panahon sa ting ulan, ang resulta hilabihang gubaa gyud sa karsada.

Matud sa MCWD nga dunay gi-hire nila nga contractor sa pag trabaho niini ug mao kini ang incharge sa  road repair ug kong dili malihok dayon sa contractor mamahimong ang MCWD ang motiwas sa pagtrabaho ug gamiton ang bond niini nga makuha lang sa contractor kon makompleto na ang pagtrabaho.

Ang problema karon sa MCWD kay maglisod sila sa pagpalit og aspalto nga ginagmay ug itabon sa karsada nga nangabangag kay binulto man ang pagbaligya ug kong mausik kini sila pud ang makaubo sa Commission on Audit kon COA.

Kinahanglan mapangitaan og pamaagi nga masulbad ang problema sa karsada kay ang safety sa mga tawo ang nakadepende niini, dili mahimong iunya unya kini kay mosamot sa ka dako ang bangag sa karsada. Sa pagkakaron tapak tapakan og anapog o yuta inig ulan ibanlas ra.

Ambot kong tinuod ba nga sa sinugdanan pa lang sa proyekto gjlisod lisod na sila sa LGU sa road excavation ug wala hatagi og permit. Gani nahimo kadtong isyu kay nakasamok gyud sa trapiko. Karon human naman, kinahanglan nga han-ayon ug kompletohon ug dili lamo lamoon.