Banawa gibaha, kinsay misunod sa sugo?

Niay personal kong kasinatian nga tukma sa ebanghilyo sa miaging Domingo, Oktubre 1. Diin gipangutana ni Hesukristo ang mga punoang pari ug kadagkoan sa lungsod kon kinsay mituman sa sugo niadtong duroha ka anak-lalaki, diin dihang gihangyo sa ilang amahan ang kinamagulan nga patrabahoon sa ilang parasan mibalibad, pero mitrabaho. Samtang ang manghod, kinsa misaad nga motrabaho, wala motrabaho?

Sa miaging Biyernes, Septiyembre 29, 2023 akong anak-babayeng minyo nangutana kon makalugar ba ko'g hatud-kuha nila: niya ug iyang 3-anyos anak-lalaki (akong apo) nga mohimog museums’ tour dinhi sa dakbayan sa Sugbo? Ako siyang gibalibaran: “Sorry, anak, dili mahimo kay magbuhat pa kog artikulong pundo para sa akong kolum sa The Freeman Banat News.”

Busa, pagkabuntag sa maong adlaw, nag-Grab taxi na lang intawon sila. Apan naunsa ba, nga pagka-alas 3:00 sa hapon, gipahibalo man ko sa among kaabag sa panimalay nga mitawag-teks kuno niya akong anak aron magpakuha kay kaganina ra silang natanggong sa One Pavilion-Banawa tungod sa kusog kaayong ulan unya walay taksing kasakyan.

Mikunot akong agtang. Nganong dili man sila makasakay nga dili man mawad-ag taksi nang lugara? Kalit lang mingulob ang dalugdog dungan sa mikusog pagsamot nga ulan. Daw hait mga pulong mipahinumdom nako: ‘akong apo hadlok kaayog dalugdog. Kalit lang kining mobaiid nako ug magpalaban.’

Dihadiha, nag-ilis dayon ko aron kuhaon sila. Apan naunsa bang pagdemano nako sa dalan Forest Hills, Banawa, daghan mang naghunong behikulong nangatanggong? Diay, miawas ang sapa sa main road, diin miabot nag lapas sa tuhod ang giladmon.

“Unya, kuhaon pa nimo sila, Jav? Basin bayag masudlag tubig imong tambutso ug mapagngag makina?” Hunghong-panghadlok sa yawa sa akong hunahuna. Pero giwakli ko kini. Maisogon kong misukol-sungsong sa halawom nga baha. Ug labihang lipaya sa akong apo’g anak sa akong pag-abot.

Ug nadungog ko pag-usab ang tubag niadtong mga lider sa simbahan ug lungsod, kinsa dihang gisukna ni Hesukristo kon kinsa ba sa duroha ka managsuon ang mituman sa sugo sa ilang amahan, sila miingon: “Ang kinamagulangan.” Kinsa, sa sinugdanan mibalibad, pero sa kataposan mituman. Nga maoy akong gihimo.

Pagkalalim paminawon dihang akong apo’g anak malipayong miingon: Salamat, Tay, sa imong pag-rescue namo.”