Tabang sa lokal nga ekonomiya
Bisan sa akong katihik, duna koy duha ka paagi pagtampo sa lokal nga ekonomiya sa mga lugar nga akong giduaw: Gawas sa akong gisul-ob, wa ko magbitbit og ilisan aron mapugos pagpalit sa ilang t-shirts; ug wa magbawon og pagkaon aron mapugos pagsuway dayon sa ilang mga putahe.
Naglisod ang akong asawang si Iris pagsabot sa akong estilo. Napamatud-an ang iyang punto dihang nagbagyo ang lugar nga among giduaw. Maayo na lang dunay mga tindahan sa silong sa hotel nga namaligya og baratuhong kamisin. Maong napakyas siya pag-usab sa akong naandan.
* * *
Dihang natanggong sa among pinuy-anan tungod sa pandemiya, naneguro og order gikan sa among mga silingan ug ubang gagmayng negosyante nga nanguhong online. Nanghinaut nga nakatampo mi og gamay sa mga panginabuhi sa nawad-an og trabaho o tradisyonal nga negosyo.
Usa sa among nakat-onan paghigugma maong mga produkto sa Samar. Human mi gasahi og corioso sa suod namong higalang Waray, nagsige na mi og panugon.
Pero tagsa ra siyang mopauli kay nia na magbase sa Sugbo. Ug tungod sa kalayo sa pantalan naglisod ang pabrika pagpadala sa mga produkto.
* * *
Usa ka pamahaw sa among kusina, nakugang si Iris sa kalami sa tinapa nga gipatilawan sa among silingang taga Masbate.
Nga gasa gikan sa iyang higalang taga Samar. Ang nindot nga packaging nitug-an namo nga hinimo sa Penn’s Gourmet Inc. sa Calbayog City, Samar.
Nagkaon pa mi dihang natultolan ni Iris ang ilang Facebook page (giganahan gyod tingali kay di na man unta ganahan sa FB). Dihang nanghugas ko sa plato, nag-chat na sila sa tag-iya.
* * *
Si Penito “Penn” Delequina nakadungog ni Iris sa Y101 pag-eskuyla niya sa Sugbo. Human nakaabot ang iyang mga produkto sa Metro Manila ug ubang bahin sa nasud tungod sa online stores, nia siya karon magbase sa Sugbo aron palapdan ang ilang distribution ngadto sa malls.
Gitug-anan siya ni Iris sa among gamayng kawsa pagtabang sa lokal nga ekonomiya, apil na sa Samar. Nalipay si Penn pagkahibawo gikan sa nihit nga FB posts ni Iris nga pareha sila og gikampanyahan sa niaging eleksiyon.
Igo silang nahuman og chat niabot ang among gi-order nga dugang mga garapon sa Gourmet Tinapa.
* * *
- Latest
