Krus ni Kristo, atong kaluwasan

Ikanapulog-Upat nga Adlaw

Sukaranang Teksto

“Kinsa kadtong buot mamahimong akong tinun-an kinahanglang ilimod niya ang iyang kaugalingon, pas-anon niya ang akong krus ug mosunod siya Kanako!” (Lk. 9;23)

Pasiuna

1. Alang kanatong mga Kristohanon ang krus simbolo sa atong kaluwasan.

2. Ang krus mahimong atong sabton ingon nga responsibilidad segun sa matang sa kinabuhi nga atong gipili.

3. Ang krus dunay duha ka mga direksiyon. Ang Vertical nga direksiyon ug ang horizontal direksiyon.

Pagpalawom

1. Ang Krus usa man ka dili mapapas nga marka alang natong mga Kristohanon. Dili kita Kristohanon kun wala ang Krus. Alang kanato simbolo kini sa atong kaluwasan. Kini tungod kay didto sa balabag sa krus bisan tuod didto nabugtoi sa iyang gininhawa ang atong Ginoo apan didto sa balabag sa krus usab gibuntog ni Jesus ang karaang kaaway nga mao ang yawa. Sa maong pagdupa sa mga kamot sa atong Ginoo iyang gitubos ang atong kaulipnan sa sala. Namatay siya aron kita mabuhi.

2.  Matag matang sa kinabuhi dunay responsibilidad nga kuyog. Diha lamang sa pagpas-an sa atong tagsa tagsa ka mga krus kun responsibilidad mamahimo kitang mabalaan usab kuyog sa maong matang sa kinabuhi mao man ang sakripisyo nga angayan natong hangupon.

3. Ang vertical direksiyon nipahinumdom kanato sa atong kalambigitan ngadto sa Dios. Kuyog ang Dios sa atong mga pag-antos bisan pa man sa mga higayon nga siya nagpabiling hilom. Ang horizontal direksiyon nipahihumdom sa atong kaakuhan nga bisan pa man kun duna kitay gipas-an nga mga suliran dili kini rason kun hinungdan aron dili kita manginlabot sa kahimtang sa uban.

Hinumdomi:

Ang yawa mahadlok sa krus ug sa krusipiho sa yanong rason nga malisang siya sa Ginoo. Si San Benito sa Nursia sa dihang gihiloan siya ginamit ang bino nga sinulod sa baso, naluwas siya niini human niya panalangini ang bino ginamit ang timaan sa krus. Ang krus mao man ang timaan sa kinabuhi matud pa ni Papa Gregorio Magno.

Pangamuyo

Atubang sa Krusipiho ug litoka kining maong pag-ampo

Sud-onga intawon ako maayo ug malumong Jesus. Atubangan sa imong larawan ako nagaluhod uban ang nagdilaab nga kasingkasing nga kanimo nangamuyo. Dasiga ang akong kasingkasing aron matisok ang pagtuo, paglaum ug paghigugma. Matinud-anong paghinulsol sa akong mga kalapasan uban ang malig-on nga tinguha sa paghimayad niini. Uban dakong gugma ug kalooy gipamalandongan ko ang imong mga samad uban ang pagpamalandong sa mga pulong ni David: “Ilang gisamaran ang akong mga kamot ug tiil, ilang gigupok ang akong mga kabukogan, Amen. Kini mao ang krus dinhi gitubos ni Kristo ang kalibutan! Dali kamo simbahon ta ang Ginoo!

Kalihukan Karong Adlawa

Himoa ang dalan sa Krus karong adlawa.