Baha

Sa unang higayon nasinati sa mga molupyo sa Santo Niño Village diha sa Barangay Banilad ang grabing baha nga nakaapekto sa dili mominus 200 ka mga panimalay niining miaging semana.

Segun sa mga opisyal sa homeowners association nga samtang naanad silang dunay bahin sa ilang village nga mobaha apan wala pa sila sukad makasinati sama sa ilang nahiaguman karong bag-o nga miabot og taga-liog ang tubig.

Matud sa homeowners association nga mohubas ra dayon ang baha kaniadto sanglit duna silay water pump nga mosuyop sa tubig 24 oras.

Apan ang nahitabo karong bag-o labihan ka daghan sa tubig nga misulod sa village nga kinahanglang i-rescue ang daghang mga apektadong molupyo.

Sa kakusog sa tubig nahugno ang paril nga maoy hinungdan sa pagbanlas sa baha paingon sa village.

Nganong ingon niadto ka daghan ang tubig? Ang pagtuo sa kadaghanan mao nga labihan na ka guba sa bukid ibabaw sa Banilad maoy hinungdan sa pagdagayday sa daghang tubig.

Ang giingon nga illegal quarry sa kabukiran maoy nakitang hinungdan nganong nasinati ang grabing baha nga wala pa sukad mahitabo.

Ang nakapait kay giingong mga opisyal ra sab sa gobiyerno ang nagpasiugda sa maong illegal quarry.

Attention sa mga opisyal sa Department of Environment and Natural Resources, palihog kuno og susi niini. Ato sab pahinumduman si Mayor Michael Rama pagsuna sa iyang mga sakop nganong daw wa nay nituman sa iyang kamanduan pagdili sa tanang matang sa quarry diha sa kabukiran.