'Carabao is better'

Mihimo na karon og mga lakang ang kagamhanan aron mapalambo ang populasyon sa kabaw (carabao) sa nasud nga gituohan nga makahatag usab og suporta sa feeding program sa mga kabataan pinaagi sa gatas nga makuha gikan sa maong hayop.  Bisan ni’ng kabag-ohan, dili gihapon masalindot ang dakong gamit sa kabaw labi na sa mga marginal nga mag-uuma.  Makapahinumdum sa estudyante nga nagpunay lang og pangayo’g kwarta sa iyang ginikanan. Mipadala siya’g telegrama nga nagkanayon, “Dear Tatay, Send me money. No money, no son.”  Sa kalagot sa amahan, gibawasan niya’g telegrama ang anak nga “Dear Son, Carabao better than you.” Pagkatoytoy!

Tanan misaka na

Gikataho nga adunay 14 ka mga manufacturers ang mi-file og request sa DTI alang sa pagpasaka sa presyo sa ilang mga produkto.  Gitumbok nga rason sa ilang hangyo mao ang taas nga raw material cost labi na niadtong mga imported nga sangkap.  Gitun-an pa sa DTI ang maong hangyo sa mga manufacturers.  Ni’ng panahon karon diin nagpasulabi ang komersyalismo, wala na gyuy purohan nga mokunhod pa ang presyo sa mga palaliton.  Matud pa sa akong higala, “tanan misaka na, ang wala na lang mosaka mao ang akong height ug ang akong sweldo.”  Fezteleern!

Premature campaigning

Gimandoan sa COMELEC ang 626 ka kandidato sa Barangay ug Sangguniang Kabataan elections (BSKE) pag-esplikar kon ngano nga mihimo sila’g premature campaigning activities bisan pa man sa pagdili niini sa kasamtangan.  Angayan tingale repasohon sa COMELEC kining maong lagda.  Bakikaw hunahunaon nga miduso na ang kandidato sa iyang kandidatura apan dili pa siya makapangampanya.  Gani, sa atong hurisdiksyon dili man maakusar nga mihimo og premature campaigning ang kandidato kon dili pa magsugod ang campaign period. Haum ni’ng kahimtanga ang panahom nga, “Hinanggaw ang balik-balik nga pagbuhat sa usa ka butang sa sama’ng paagi unya magpaabot og lahi nga resulta.”  Madahaan!

Diyotay ug ulahi na

Gihulagway sa mga kahugpongan sa mga mamumuo sa lalawigan sa Sugbo nga “Diyotay ug Ulahi na Kaayo” ang bag-o lang gi-aprobahan nga P33 nga uniform wage increase sa mga trabahante sa Central Visayas.  Layo ra kini sa ilang gipangayo nga usbaw nga P100-P292 matag adlaw.  Makapahinumdum ang reklamo sa mga mamumuo sa bata nga naghilak kay nahulog ang iyang piso sa imburnal.  Aron mohilom, gihatagan siya’g lain’g piso apan misamot hinoon paghilak ang bata.  Sa dihang gipangutana ngano misamot siya’g hilak, mitubag ang bata nga, “Kon wala pa mahulog ang akong piso, ‘dos pisos’ na unta akong kwarta”.  Fishkots!

Ordinahan ang minyo

Giaprobahan na ni Pope Francis ang hangyo sa mga Obispong Pilipino nga ordinahan ang mga minyo o bisan dili minyo nga mga kalalakin-an isip permanent deacons sa tuyo nga matubag ang kakulang sa mga pari.  Gituohan nga ang maong lakang makapadasig sa pag-salmot sa mga layko sa gimbuhaton sa pagsangyaw.  Maanindot kining maong kalamboan.  Tukma ug haum kini nga tubag sa hagit sa bibliya nga nag-ingon, “Daghan ang anihonon apan diyutay ra ang mangangani.” Hinaut pa unta!