Simeon “Gabro” Gabutero

Miatubang na gyud sa mga sakop sa media ang tawo nga gibaligyaan ni Simeon “Gabro” Gabutero sa cellphone ni Rhea Mae Tocmo human niya ‘patya’ ang dalaga kaniadtong buntag sa Hulyo 16.

Ang maong tawo mibarug gyud nga Hulyo 16, adlaw’ng Domingo sa alas 2:10 sa hapon nga miadto si “Gabro” sa iyang stall ug mibaligya sa cellphone nga kinit-an kuno niya didto sa Naga.

Gipaminaw gyud nako pag-ayo ang interview sa maong tawo nga nakapalit sa cellphone ni Rhea Mae sa kantidad nga P1,700. Mao usab kini ang kantidad nga gitug-an ni Gabro sa unang mga interview kaniya nga P1,700 ang pagkahalin sa cellphone.

Mitumaw ang maong tawo kay gusto niyang hatagan og katin-awan ug suportahan ang kapolisan kay nakabantay siya nga adunay gustong manglawgaw sa resulta sa imbestigasyon.

Ang iyang gipasabot mao kining usa ka “Bianca Lee” nga nangangkon nga may footage usab siya sa CCTV nga nagpakita nga ang naglabay sa karton nga gisudlan sa patay’ng lawas ni Rhea Mae usa ka taxi, ug apil gyud kadtong usa ka Jewel.

Usbon nako, bisan ako kontento kaayo ko sa resulta sa imbestigasyon sa kapolisan kay suportado ni og mga CCTV footages nga nagpakita nga sila gyud si Gabro ug ang iyang manghud maoy naglabay sa lawas ni Rhea Mae didto sa Barangay Tisa.

Aw, gani, giangkon man usab kini sa 15-anyos nga manghud ni Gabro nga siya maoy nag-angkas sa motor nga gimaneho sa iyang maguwang ug siya maoy migunit sa karton aron dili mahulog.

Dunay daghang CCTV footages ang kapolisan nga nagpakita nilang Gabro ug sa iyang manghud nga nagsakay sa motor. Gani, ang motor, ang helmet, ang sinena nga gisul-ob ni Gabro ug sa iyang manghud, anaa karon sa kapolisan isip ebidensya.

Kataw-anan kaayo ang pamahayag nga Hulyo 17 sa gabii, sa ato pa patay na si Rhea Mae nianang higayona, ug naka-text pa kuno ang dalaga.

Unsaon pag-text ni Rhea Mae nga patay na siya, ug ikaduha, ang iyang cellphone gibaligya na ni Gabro? Ang gibaligyaan ni Gabro sa cellphone, mi-unlocked sa cellphone ug gibaligya niya sa iyang gitawag og “boss Jeff” nga wa niya gi-delete ang mga pictures sa gallery.

Kini na si “boss Jeff” maoy mitug-an sa unang nakapalit sa cellphone, nga ang cellphone nga iyang napalit, iya kang Rhea Mae kay nakakita siya og hulagway sa dalaga, kay atol sa maong napublikar na man ang nawong ni Rhea Mae sa media.

Hagiton nato kining “Bianca Lee” kon tinuod man gyud siyang tawo, nga motunga usab siya ug ipresentar ang iyang mga ebidensya aron mawagtang ang atong pagtoo nga siya manglawgaw ra.