Walay timik  ang lagong

Miluwat og kamanduan si Presidente Marcos, Jr., pinaagi sa Executive Order (EO) 39, nga nag-imponer og ceiling sa presyo sa bugas sa kamerkadohan. Ubos sa maong E.O., ang regular milled rice pagapresyohan og P41 matag kilo samtang ang well-milled rice paga-presyohan og P45 matag kilo.  Halayo gihapon kini sa gisaad nga P20 nga presyo matag kilo apan gibatukan ang maong kamanduan sa mga retailer sa bugas.   Komentaryo sa akong higala, “kusog moreklamo ang tawo kon presyo sa bugas ang mosaka; apan kon momahal ang beer ug sigarilyo, walay timik ang lagong.”  Feztleern!

Mapa sa mapa

Gisalikway sa Pilipinas ang 2023 version nga mapa sa China nga naghulagway sa bag-ong 10-dash line nga naglatid sa utlanan sa teritoryo sa China diha sa South China Sea (SCS). Ang maong mapa, nga gibatokan usab sa uban’g nasud, naglangkob na sa dakong bahin sa SCS ug nalakip na niini ang exclusive economic zone sa West Philippine Sea.  Dili obligado ang mga kanasuran pagtamod sa bag-ong mapa sa China.  Labot pa, walay makapugong sa Pilipinas nga magbuhat usab kita’g kaugalingon nato’ng mapa nga maglatid sa atong teritoryo.  Mao na’y giingon nga, “Ngipon sa ngipon, ‘mapa sa mapa.’” Bawos-bawos lang!

Kanunay’ng masayop

Gi-monitor karon sa PAGASA ang mga pungpong sa panganod nga may posibilidad nga mahimong low pressure area sulod sa 24 oras ug mahimong tropical depression sa tumoy ni’ng semanaha.  Makalibog na ang mga pagbanabana sa panahon nga giluwatan sa PAGASA.  Gipasidan-an kita sa ahensya dili lang dugay nga misalga na kuno ang El Niño ug miawhag ang kagamhanan sa pagpangandam sa taas nga huwaw ug kakulang sa tubig.  Apan sukwahi man ang mga panghitabo karon. Mao kana’y giingon sa pagya-komedya nga “Ang panahon karon nahisama na lang sa gobyerno….kanunay na lang masayop.” Madahaan!

Makalibog si titser

Gibutyag sa Department of Education nga paglabay sa pipila ka adlaw gikan sa pagbukas sa klase, wala makab-ot ang target nga gidaghanon sa mga mi-enrol sa basic education.  Wala mabutyag ang hinungdan ngano nga wala makab-ot ang target nga gidaghanon sa mipa-enrol.  Ni’ng pagkunhod sa enrollees, makapahinumdom sa estudyante nga buot moundang pag-eskwela kay matud pa sa estudyante, “Ingon si Titser, ang iningles sa pan, ‘brid’; unya ang iningles pud kuno sa tulay, ‘brid’ gihapon.  Makalibog man, may’pa moundang.” Pagkatoytoy!

Bug-at ang nawong

Segun sa pagtuon nga gihimo sa Kantar, usa ka marketing data and analytics company, nasayran nga ang mga Pilipino’ng konsumidor mas ganahan sa mga noodles ug kape taliwala sa nagtubo nga panginahanglan sa mga fast moving consumer goods (FMCG).   Wala mahisgoti kon aduna ba’y kalambigitan ang kapobrehon sa katawhan ug ang ilang kagustohan sa noodles ug kape apan posible nga usa kini sa hinungdan.  Mao kanay giingon nga, “Kaniadto kon mangompra ka dala ang usa ka libo ka pesos, gaan kaayo imong nawong unya bug-at ang imong dala.  Apan karon, bug-at kaayo imong nawong unya gaan kaayo imong dala.”  May’pag moligeed!