May ngipon kaha ang EO 39?

Kadaghan na madismaya ang katawhan sa mga pasalig nga manggawas sa baba ni Presidente Bongbong Marcos (PBBM). Kay kini kutob ra sa iyang baba. Ug wala matinuod. Dihang miingon siya sa iyang ikaduhang State of the Nation Address (SONA) nga inihap na lang ang mga adlaw sa mga ismagler, hoarders ug ubang korap nga maoy nagmanipula sa presyo sa produkto o abot sa atong agrikultura, kining maong illegal nga kalihokan hangtod karon nagpadayon.

Timaan, nga si PBBM walay igong gahom nga makasumpo sa mga ismagler ug hoarders. Kay kon aduna pa, wala na untay mga bentahosong negosyanteng kusog manago og toneladang sinakong bugas sa mga dagko nilang bodega nga maoy hinungdan sa grabeng pagtaas sa kantidad sa palitonon natong humay ning panahon nga naatol pa gayod nga nagakadaghan ang wala nay trabaho.

Hinungdan, nga kadtong naturiring ang utok tungod kay wala nay ikapalit sa nagkamahal nga bugas, mapugos na lang pagbuhat og krimen ug malipay pang mabalhog sa bilanggoan. Kay didto libre ang kaon. Unya maka-sideline pa pagnegosyog shabu. Labi na, kon adto kini mapunta sa New Bilibid Prison, diin gipabuhatan gyod og mga kubol ni Bucor Director Gregorio Catapang Jr. ang gipangga niyang mga inmates.

Maayo si Catapang kay bisan wala matuman ni PBBM kadtong iyang  gisaad  nga himoong P20 ang kilo sa bugas  nga miabot na karon og tag-P56 ang kilo,  makapalit man gihapon siyag mga sinako. Ang mga kabos intawon?

Hinuon, may gipagawas nang Executive Order 39 si PBBM or Mandated Price Ceiling law, nga mopugong aron dili kapatuyang sa pagpamahal sa bugas ang mga negosyante. Kamandoan kini nga kutob ra sa P41 ang regular milled rice ug P45 ang well-milled.

Miani kinig negatibong reaksiyon sa mga gagmayng magpapatigayon, kinsa mipadayag nga maalkansi gyod sila kon tumanon kining balaora. Usab, ang mga supplier mipalag. Kay kuno mahal na daan ilang kuha sa bugas gikan sa tinubdan. Unya ang transportasiyon, mahal na pod baya. Mao nga maglisod silla sa pagpaubos sa presyo. Kini nagpasabot, daghang negosyante ang supak sa EO 39. Dakong hagit sa mga otoridad ang pagpatuman niini. Ug dnhi masayran, kon may ngipong hait ba kining balaora?