Pagpug-ok sa demokrasya
Seryoso ang pasangil batok ni Bise Presidente Sara Duterte Carpio: Gawas nga nigasto siya og P125 milyones sa confidential funds niadtong 2022 bisan way gigahin ang Kongreso para sa maong katuyoan, gihurot niyang kuwarta sud lang sa 19 ka adlaw.
Wa motubag si Carpio. Nipasalig nga ipasabot ang kontrobersiya atol sa iyang pagpanalipod sa budget sa Office of the Vice President (OVP) sa House Appropriations Committee. Tuod man, niatubang siya sa mga kongresista niadtong Miyerkules. Pero wa siya motanyag og katin-awan. Ug gidili ang pagtuki sa kontrobersiya tungod sa kaikog.
* * *
Di na ikahibulong ang kasipsip sa mga kongresista. Gawas sa binuang nga tradisyon sa “parliamentary courtesy” nga di kutikutihon ang budget sa Office of the President (OP) ug OVP, naandan nang duphanay sa mga alyado sa politika.
Pero dunay naglaom nga wa pa matakdi si Carpio sa ka-trapo sa iyang amahan. Gawas pa, nipasalig siya pagtubag sa pasangil. Nipasumbingay pa gani nga human sa iyang pagpasabot mabisto ang ka-iresponsable sa mga pasangil. Tungod sa padayong pagpakahilom ni Carpio, mosamot kabug-at ang mga panaway sa Alliance of Concerned Teachers (ACT).
* * *
Di katabang sa kawsa ni Carpio ang law-ay nga pasundayag sa liderato sa House sa pagpanalipod niya. Gipawongan nila sa mikropono si Kongresista France Castro nga nangahas pagpasabot nganong supak sa paglaktod sa pagtuki sa OVP budget.
Imbes gamiton ni Carpio ang kahigayonan sa pagboluntaryo sa gisaad nga katin-awan, dali siyang nibarug ug nibiya. Labihan kamasaligon nga ang makabungog nilang mayoriya sa Kongreso mopahilom sa tanang pangutana sa P125 milyones niyang pinaskohan niadtong 2022.
* * *
Nahasol ba pag-ayo si House Speaker Martin Romualdez nga gitawag siyang Carpio nga “tambaloslos” niadtong Mayo maong giseguro nga mapakita ang iyang gahom sa pagbaraw sa bisan unsang pakauwaw batok sa ikaduhang labing taas nga opisyal sa nasud?
Pero ang pagpamugos sa salida, imbes ipasabot unsa ang balaod nga nagtugot ni Marcos sa paghatag og P125 milyones nga confidential funds ngadto ni Carpio, nipasamot lang sa kahadlok nga labihan katandugon sa demokrasya sa nasud: Mahimong iwara-wara ni Presidente Ferdinand Marcos Jr. sa iyang pagpahumot sa ubang kanasuran; pero mahimo sang pug-ukon ug yatak-yatakan aron paghipos sa ilang mga kaatbang.
* * *
- Latest
