EDITORYAL - Respeto sa police checkpoints  

Ang kapolisan hugot na sab mipatuman sa Omnibus Election Code nunot sa taliabot nga piniliay sa Barangay ug Sangguniang Kabataan karong bulan sa Oktobre ning tuiga.

Daghang mga Comelec checkpoints nga makita sa kadalanan nga ang tumong mao ang pagsigurong hapsay ug malinawon ang umaabot nga piniliay sa barangay.

Apan daghang nagbagulbol kay sa checkpoints ang mga motorsiklo ra maoy pangsitahon ug tan-awon ang lisensiya, OR ug CR sa riders. Apan ang mga de-sakyanan kasagaran palabyon lang.

Mura ba og dunay diskriminasyon, ang mga magmotor lang ba diay maoy mohimo og krimen?  Kung armas ang hisgutan, duna man sab tingali mga ilegalistang magsakyanan.

Apan sagad man gud sa mga krimeng nanghitabo karon sagad binuhatan sa mga kriminal nga nagsakay og motorsiklo o riding in tandem.

Hinuon ang PNP dunay higpit nga guidelines nga gipasunod sa mga sakop niini matag magpahigayon og checkpoints, apan daghan sa mga sibilyan ang wala masayod kun unsay angay buhaton.

Subay sa Omnibus Election Code ug bisan sa PNP Guidelines sa paghimo og checkpoints, kinahanglang anha kini buhaton sa “well-lit area” o kanang hayag dili sa mangitngit nga bahin sa karsada, kinahanglang unipormado ang mga polis, naay patrolcar, naay signage sa checkpoint ug labaw sa tanan ang “plain view doctrine” kinahanglang tumanon kanunay.

Kutob lang sa “visual inspection” ang buhaton, bawal pakanaugon sa sakyanan, bawal sab ang pagrekisa. Andama daan ang lisensiya ug dokumento sa sakyanan o motor aron kun pangitaon mapakita dayon.

Kun walay nakitang inisyal nga kalapasan, gidili gyud ang pag search sa u-box, carrier box, compartment sa sakyanan, bulsa  ug bags sa motorista, kay kini matawag na nga illegal search.

Basta morespeto lang ang motorista sa kapolisan ug sa samang higayon respetuhon sa mga polis ang katungod sa mga motorista, walay problema.

Maayo nga naa kanunay checkpoints kay pinaagi niini makapaduha-duha gyud kini sa mga kriminal. Gani duna nay mga krimen nga daling nasulbad pinaagi sa checkpoints.