EDITORYAL - Body cams, proteksyon sa tanan

Unsa ka importante nga ligdong sa serbisyo ang usa ka polis? Importante kaayo kini tungod kay sila maoy tigpatuman sa balaod. Kinahanglang walay bisan gamay nga malisya, personal nga interes o dautang motibo sa paghimo nila sa ilang trabaho.

Kini tungod kay isip tigpatuman sa balaod, giisip silang otoridad nga tuohan ug sundon sa mga tawo para sa kahapsay ug kalinaw sa lugar. Kinahanglan nga sila kasaligan ug masandigan sa tanan dili dudahan sa mga tawo.

Apan tungod sa pipila ka lugas nga sakop sa PNP nga wala aning maong mga hiyas nga gihisgotan sa taas, naduhig hasta ang mga tarong.

Dili mabasol sa kapolisan ang publiko nga mahadlok kanila kay lagi duna nilay mga abusado kay nagsalig nga sila polis.

Gani aron malimpyohan ang organisasyon, daghan ng gipanghimo ang kadagkoan sa PNP  aron pangitaon, ilhon, ug taktakon ang mga abusado nilang sakop.

Ning bag-o, dunay 17-anyos nga batan-on nga napatay sa police operation. Gihulagway nilang ‘mistaken identity’ kadto atol sa pagresponde nila sa shooting alarm.

Giingong dili armado ang maong batan-on, tungod sa iyang karatol sa ginukoray nilayat kini sa sapa, apan didto, gipaulanan kini og bala sa mga polis. Ang usa sa mga polis nga giingong nipusil kaniya nagsuot og body-camera, apan gipawong kini.

Daghang nangutana, hasta mga magbabalaod nganong gipawong nga unta duna nay direktiba ug mismo ang Korte Suprema miingon nga kinahanglang magsuot gyud kanunay niini ang mga polis ug dapat naka ‘on’ o nag-andar kini atol sa operasyon.

Imposibleng wala masayod ang maong polis nga nakapusil nga wala mag-on ang iyang body camera. Imposible sab nga wala siya mahibawo sa direktiba isip usa ka polis.

Kung pawngon gani ang body camera sa polis atol sa operasyon, siguradong duna kini buhatong lapas sa balaod, lapas sa operational procedures ug siguradong naanad na kini nga magbinuang sa trabaho.

Ang body camera dili lang proteksyon sa mga suspek, proteksyon sab kini sa mga polis aron kun dunay moreklamo sa ilang gibuhat, duna silay ikapakitang video nga nagsubay sila sa proseso.