EDITORYAL - Brigada Eskuwela

Karong umaabot nga Agosto 29,2023 opisyal nang mobalik ang klase sa tanang pangpublikong mga eskulyahan dinhi sa nasud. Minilyon ka mga tinun-an ang magdugok na unya sa nagkadaiyang mga tunghaan alang sa ilang edukasyon.

Gani sa mga pribadong eskuylahan, ubay-ubay na ang nagsugod balik sa ilang klase samtang ang uban padayon pa sa pagdawat og mga enrollees para sa tuig.

Sukwahi sa mga private schools nga dunay kaugalingong maintenance ug janitorial personnel nga sinuweldohan gikan sa tuition fees sa mga estudyante, ang public schools wala.

Mao nga dunay mga Brigada Eskwela nga buhaton usa ka semana sa dili pa ang aktwal nga pagbalik sa klase. Anang mga adlawa sab dunganon ang pagdawat nila og mga magpa-enroll ug pagkolekta og PTA fees ug uban pa.

Apan nabantayan nga dili na kaayo parehas kaniadto ang mga ginikanan nga mangapil og Brigada Eskwela.

Kaniadto kugihan kaayo nga magpanon ang mga ginikanan dala ang ilang mga silhig, dustpan, guna, mga gamit sa panday ug uban pa aron tabangan ang eskuylahan sa ilang mga anak nga maandam sa pagbukas na sa klase.

Karon, tungod ba kaha sa ka busy na sa trabaho, ang mga bata nalang maoy manambong sa Brigada Eskuwela.

Duna hinuoy mga volunteers gikan sa mga pribadong grupo ug nagkalain-laing ahensiya sa gobiyerno ilabi na ang gikan sa kapolisan, kasundalohan, kabomberohan ug uban pa nga andam motabang.

Sa pagbalik na unya sa klase ilabi na dinhi sa Central Visayas gipaabot nga natarong na o nangaayo na og balik kadtong mga school buildings nga nangaguba sa bagyong Odette sa miaging tuig.

Ubay-ubay sab nga mga eskuylahan ang nakaangkon og danyos tungod sa maong katalagman. Gawas pa sa bagyo, naa sab ang mga walay kataposan nga problema sa mga pansayan sa mga bata, mga gripo nga walay tubig ug ang kakuwangon sa bentilasyon sa mga lawak-saringan.

Maayong karon palang, mahinayhinayan na kini og sulbad sa DepEd para sa kaayohan sa pagtuon sa mga bata.