Santa Filomena

Daghan ang mga Santa Filomena. Apan matud pa si Filomena usa ka birhen nga nahiagom sa mapintas nga pagpanglutos ni Emperador Diocletian.

Usa siya sa daghanang mga Kristiyanos ang nangamatay sa kamatayon sa martiryo.

Ang pagka martir mao man ang paagi sa ilang pagsaksi kaniadto.

Hinuon kun maghisgot kita og martir nagpasabot man kini og saksi gikan sa pulong griyego nga martures kun saksi. Kaniadto ang pagsaksi nagkahulogan man og pag-ula sa dugo.

Apan dunay nindot nga panultihon nga atong mapupo gikan kang Filomena.

Siya kadtong nagkanayon: “Mas maayo pa nga mahimong anak sa Dios kaysa mamahimong hari ning kalibotana."

Kining maong panultihon nagdasig kanato nga atong angkonon ang atong limitasyon.

Nga diha sa atong panaw sa kinabuhing tawhanon ug espirituhanon angayan lamang nga maglagsik kita padulong kang Kristo Jesus.

Ang pagpili sa kamatayon kaysa luiban ang pagtuo usa naman ka dakong grasya o milagro. Kining maong sanglitanan makapadasig unta kanato karong mga panahona nga mas labanan nato ang atong tinuohan kaysa pasagdan lamang nato kining dauton ug panamastamasan.

O dili ba kaha bugal bugalan aron mahimuot lamang ang kalibutan. Unta ang kaisog sa mga martir sama ni Santa Filomena mahuptan unta nato karong mga panahona.