EDITORYAL - Tulisan sa kadalanan

Makaalarma ang nag-viral nga video nga nagpakita sa usa ka lalaki nga nitungtong sa usa ka cargo truck nga dunay dalang sinakong bugas ug gikuha ang usa niini. Nahitabo kini matud pa diha sa port area sa Cebu City.

Apan sa video, gidemalas ang maong lalaki kay sa dayon niyang kanaog nahagbong kini unta ang bukton didto sa sementadong dalan, nakita sa video nga nagping-it sa kasakit nga nagsapupo sa iyang bukton ang maong lalaki, timailhang nabalian kini.

Ang maong video makapabalaka para sa mga motorista ilabi na sa mga delivery trucks ug vans kay dunay mga susamang hitabo didto sa Manila nga ingon niana.Grabe lang kaayo didto kay dili lang usa kondili lima o mas daghan pa ang magtinabangay sa pagkawat sa tanang mabitbit nila gikan sa trak nga ilang gikawatan.

Gikan sa baterya sa trak, gallon sa tubig, mga tools, ug uban pa nga pwedeng mabaligya ilang hutdon og kuha, unya walay mabuhat ang drayber ug ilang pahinante tungod sa kahadlok.

Gani duna pay video gikan gihapon didto nga diin ang drayber mismo sa delivery van wala makapiog, kay samtang nag-urong ang sakyanan sa traffic, gialirungan sila sa mga kalalakin-an nga diretsong miabli sa ilang pultahan gipanghimulbolan sila sa ilang mga butang.

Walay kukahadlok, wala gani manabon sa ilang mga nawong, ingon niana ka agresibo ang mga kawatan ug tulisan didto.  Kadtong nahitabo sa lalaking natagak sa trak nga giingong dinhi sa pier area sa Cebu City nahitabo, makapukaw unta kini sa mga otoridad ilabi na sa Cebu City Police Office ug sa mga barangay sa port area.

Dili unta paabuton pa nga mahisama sa Manila ang kaagresibo sa mga tulisan ug kawatan tungod wala sila santaa sa pagsugod palang. Karon migara na sila didto, maayo unta og mapakgang na sab kining modus dinhi sa Sugbu mintras dili pa tanto grabe.

Ang maong lalaki sa video nga natagak sa trak nadakpan na hinuon sa kapolisan apan sa laing krimen. Nadakpan siya sa buybust operation ug matud pa miangkon kini nga siya kadtong naa sa video nga natagak sa trak.