Pagtulon-an gikan ni San Juan Maria Vianney

Sa akong pagtagik niini, gisaulog ang handumanan ni San Juan Maria Vianney among patron isip mga Padre Kura.

Siya kadtong gilisod-lisod pag-ayo sa iyang pagtuon aron mamahimong pari. Kini tungod kay duna siyay  kakulian sa pulong latin.

Apan bisan pa man, napari siya ug kay lagi giisip man nga yano ug way kabangkaagan, gipadala siya ngadto sa Ars usa ka hilit nga dapit sa Pransiya aron moalagad isip Padre Kura.

Apan bisan pa man sa iyang kayano, napamatud-an nga siya balaanon. Iyang gihatag ang tanan ngadto sa katawhan diha sa kumpisalan.

Ang balaanong kinabuhi niya nakapadani og daghang mga kalag nga mobalik ngadto sa Dios ug sa simbahan pinaagi sa iyang makugihong pagpaminaw ug pagpasaylo sa ilang mga sala.

Tungod niini nasuko kang San Juan Maria ang yawa. Literal gyud nga gipaantos sa yawa si San Juan Maria dili siya hatagan og higayon nga makapahuway kada gabii.

Matud pa niya: “Do not try to please everybody. Try to please God, the Angels, and the Saints, they are your public!”

Ning atong kapanahonan karon subo palandungon nga daghang mga layko ang magpakapari ug ang mga pari magpakalayko.

Tungod sa ngalan sa inclusivism dunay mga  buhat nga angayang lihokon sa parianong mga kamot apan gihimo naman sa mga layko bisan pa man kun anaa ang mga pari.

Nahanaw ang proper decorum. Ang kadasig sa pagluwas og daghang mga kalag ang nahimong naluya gumikan sa materiyalismo.

Husto gyud siya San Juan Maria sa iyang pag-ingon: “Ang pari mahimong malangit ug ma-impiyerno kuyog niya ang liboan ka mga tawo.”