Di na mag-crank

Kabahin sa kultura ug tradisyon sa mga Pilipino nga magpatuli gyud ang mga lalaki. Usa sa mahinungdanong rason sa paghimo niini gawas sa tradisyon ug kultura mao ang “personal hygiene”.

Ug tungod kay kandidato sa sungog ang pisot, sagad sa mga way tuli di gyud mokuyog sa panon sa iyang mga barkada panahon nga sila mangihi. Kun duna kay barkada nga ingon niini siguradong pisot ni o ba kaha hinigtan og lanot ang iyang buhi.

Wala pa mauso ang medical mission ug mga operation tuli sa among panahon didto sa probinsiya busa ang kinaraan nga paagi sa pagpanuli sama sa pakang ug kudlit ang among giagian.

Palingkuron mi sa bangko nga mag-usap daan og udlot sa bayabas aron ibugwak sa samad human og tuli.

Human og tuli maglumba mi niadto pagtugsaw sa labihan pa katin-aw nga lim-aw sa sapa.

Ingnon dayon mi sa mga tiguwang nga kinahanglan gyud nga matuli aron kuno motubo ug maminyo kay alang sa katiguwangan dakong kauwawan sa usa ka lalaki ngadto sa iyang asawa kun sa unang gabii sa ilang kaminyoon mahibaw-an nga wa siyay tuli.

Nahinumdom ko sa sugilanon sa mga karaan mahitungod sa pisot nga bag-ong minyo. Sa unang gabii sa ilang panagtiayon, nahibulong ang asawa kay motalikod man ang iyang bana.

Dihang gipangutana sa asawa unsay iyang gihimo, mitubag kuno ang bana nga, “huwat usa kay ako pang gi-crank.”

Tingali ingon niini ang gihimo sa 73 anyos nga si lolo Mado sa Zone Pansat, Barangay Calawisan sa dakbayan sa Lapu-Lapu sa dili siya modulog sa iyang asawa kaniadto. Magpunay tingali siya og crank.

Si lolo Mado usa sa upat ka mga pisot nga nagpangidaron og 20 anyos pataas diha sa Lapu-Lapu nga misanong sa hagit ni Mayor Ahong Chan nga magpatuli.

Ang mayor mitanyag og P10 mil alang sa mga pisot nga nag-edad og 20 anyos pataas aron magpatuli tungod kay wa kunoy kaliwat si Lapu-Lapu nga pisot.

Si lolo Mado nga duna nay pito ka mga anak ug 62 ka mga apo nadasig nga magpatuli busa di lang P10 mil kun di P20 gyud ang gihatag sa mayor kaniya. Si konsehal Emilio Galaroza nga usa ka doctor maoy nangunay pagtuli ni lolo Mado.

Apan ambot og makahimo pa ba kaha si lolo Mado karon nga di na siya kinahanglang mag-crank.