Kinabuhi nga pulos bakak
Mahimong nakapamakak ka sa imong edukasyon. Nga naka-gradwar ka sa bantogang eskuylahan pero wa diay. Mahimong nakapamakak ka sa imong mga obligasyon sa gobiyerno. Nga nakabayad ka sa imong income tax pero wa diay.
Mahimong nakapamakak ka parte sa imong pamilya. Nga nakaserbisyo sa katawhan pero nakapahimus diay. Mahimong nakapamakak ka parte sa imong mga ginikanan. Nga mga ligdong pero mga kawatan diay. Nga nakapalambo sa nasud pero nakapa-bangkarota diay.
* * *
Pero karong naghupot na sa labing taas nga katungdanan, magpadayon pa ba sa pagpamakak? Nga bisan ang kinagamyan nga pangulipas mahimong molanog sa tibuok kalibotan? Ug tungod sa ka-importante na sa imong posisyon, ang isabwag nga mga bakak mahimong makadaot sa tibuok nasud ug sa tanang katawhan?
Kon ang pagpamakak kasarangan na nga bahin sa imong kinabuhi, kay maoy namat-an og buot ug nasunod sa katiguwangan, di ba angayng susihon unsaon sa pagputol sa salawayon nga buhat? Di ba kabahin sa imong pangandoy nga mahimong mas matinud-anon sa umaabot nga mga adlaw?
* * *
Sa sunod higayon nga mopaundayon na sab sa tentasyon sa pagpamakak, palihug ginhawa og lawom, pangita og lugar nga mag-inusara ug makapamalandong, ug pangutan-a ang imong kaugalingon: Unsay imong gibati human namakak? Gilainan ka ba? O mapagarbuhon nga nakapangilad na sab?
Unsa mang klaseha ang imong bakak: Pingis ba lang sa tinuod; wa ba lang isulti ang angayng isulti; gipasobrahan ba lang ang tinuod nga hitabo; o nag-imbento gyod og di tinuod nga istorya?
* * *
Kon inosente ang bakak, mahimong nasipyat o nakalimot lang. Kon nanglubag na gyod og mga numero ug nituwad na gyod sa mga panghitabo, komplikado na ang imong kahimtang kay nabaid na pag-ayo ug mas maglisod na paghunong sa pagpamakak.
Kon gilainan human namakak, may kahigayonan pang mausab. Pero kon malingaw sa abiba human namakak, labi na kon ang mga namakpak nahibawo nga gibakakan sila, ug imbes modemanda nga sultihan sa tinuod nangayo pa hinuon og dugang bakak, kahadloki ang imong ugma. Way bakak nga molahutay hangtod sa hangtod. Di maayo ang mga panghitabo kon mahukasan na ang pagpangilad. Para nimo ug sa imong pamilya. Ug labi na gyod para sa nasud ug sa katawhan.
* * *
- Latest
