Anaa gihapon ang mga maayong mga tawo

Bisan pa man kun nahimong dautan ang palibot ug daghan ang mga dautang tawo ning atong katilingban atong hinumdoman nga duna gihapoy mga tawo nga buotan ug manggihatagon.

Mga tawo nga bisan pa man kun gibuhatan na sila og dautan apan padayon gihapon sila sa paghimo og maayo. Apan hangtud ug asa kutob?

Nagpasabot ba kini nga magpunay lang kita og hangyo sa dunay ilaha aron masinati nato nga napun-an ang atong kakulangan? Hinumdoman nato nga ang dunay kaya ang naningkamot baya aron makabaton sila sa ilang nahuptan karon.

Kun wala kini nila buhata tingali dili pud molambo ang ilang kinabuhi. mao nga ang pagkamaayo ug pagkamanggihatagon apil man sa laraw ug kabahin sa kinatibuk-ang panaw.

Ang pagpundo alang sa kaugalingon dako man og  kahimoan alang sa seguridad sa umaabot. Mao nga dili  makatarunganon kun atong basulon ang mga adunahan sa atong kakabus karon kay kun naningkamot pud unta kita mamahimo pud unta kitang sama kanila. Hinuon, dunay gipalad, dunay gidemalas.

Mao nga ang key word ra gyud ning tanan mao man ang simple living matud pa.

Ang mga maayong tawo atong himoong inspirasyon. Ang ilang kinabuhi unta makapadasig kanato sa paghimo og maayo sa uban sa walay pagtandi sa atong kaugalingon ngadto kanila.

Kay kun mohimo kita og pagtandi sinugdanan na kini sa atong kagul-anan nga dili hitupngan. Kun may nailhan kang mga maayong mga tawo nan, sunod sa ilang panig-ingnan.