Kinahanglanon ba gyud?

Nahimong sumsoman sa netizens ang bag-ong logo sa Philippine Amusement and Gaming Corporation (Pagcor) agi og pagsaulog sa ika-40 ka tuig sukad sa pagkatukod sa maong ahensiya.

Daghan ang mihulagway nga usa kini ka matang sa pagwaldas sa kwarta sa gobiyerno. Alang sa mga nanaway mahal ra alang sa kapin sa P3 milyones nga kontrata ang logo nga kaanggid sa logo sa Petron Corporation.

Ang ubang mga kritiko miingon nga bati ang bag-ong logo ug mas desente nga tan-awon ang karaan nga logo niini.

Apan sa di pa ta hingpit nga lamonon sa atong kasuko ug magpatuyang nalang sa atong mga pamasangil ato usa tingali nga suknaon atong kaugalingon unsay atong basihanan sa pag-ingon nga mahal ra ang maong kontrata paghimo og logo.

Labing siguro niagi og public bidding ang maong proyekto. Gawas lang kun dunay graphic artist nga sama og kalidad sa nidaog nga bidder ang moingong mahal ra ang maong logo.

Ang tinuod mahal gyud ang pagkuha sa serbisyo sa usa ka professional. Apil sa imong gibayran ang pila ka tuig nila nga pagbansay sa ilang profession.

Busa di nalang ko makiglalis mahitungod sa presyo. Tingali ang isyu dinhi nga angayang ipasabot sa mga opisyal sa Pagcor kun kinahanglanon ba gyud ang bag-ong logo.

Kun kinahanglan, angayang ilang tagsa-tagsaon pagpasabot sa publiko unsay ikatampo niini sa pagpalambo sa ilang operasyon?

Kun wa ray mausab sa ilang kita ug operasyon gamit ang bag-ong logo tingali sayop ang gihimo sa Pagcor.

Mas nasalbar tingali ang Pagcor sa magpagsaway kun gipaagi nila og usa ka indigay sa pagbuhat og logo isip kabahin sa ilang ika-40 nga anibersaryo.

Mas makatabang pa ang Pagcor pag-discover og bag-ong mga talento. Tingali di kaayo init sa mata sa mga magbubuhis kun gigasto ang kantidad isip premyo sa mga mananaog.