Sundugon si Lee Kuan Yew

Angay na gyud nga hingusgan ang pagpabalik sa karaang gilapdon ug ang gilawmon sa atong kasapaan aron nga malikayan na ang paglunop sa downtown Cebu City kon mag-uwan.

Tinuod, dunay mangasuko kon papahawaon gikan sa tampi sa kasapaan ang ubay-ubay nga mga lumolupyo, apan kon himoon ni, mas daghan ang mangalipay.

Dunay mga dapit nga kining namuyo, ug nagtukod og building daplin sa kasapaan nga maoy nakapagamay sa gilapdon sa sapa ug nakaingon sa problema.

Makadaghan na nako gibalik-balik nga kining Estero Parian, kining sapa nga anaa magsubay ilawom na sa dagkong mga tindahan sa Colon, lapad ug lawom ni kaayo kaniadto.

Sigun sa karaang mapa, masulod gud ang sakayan nga adunay katig diha sa Estero Parian gikan sa bukana sa dagat sa may Pier 3.

Sa pagpanglabay sa katuigan, ang mga nagpuyo daplin sa Estero Parian, nga gitawag na karon og Parian Creek, naghimo og riprap diha sa sapa aron molapad ang ilang mga puwesto.

Unya, naglisud na ang atong kagamhanan sa paglimpyo sa kasapaan tungod kay hugaw na kaayo. Ang mga hugaw gikan sa kabalayan, deritso ra nga gipaagas sa sapa.

Ang ubang lumolupyo anaa ra sa sapa molabay sa ilang mga basura, ilabi na kon mokusog ang baha, ipaanod ra nila ang ilang mga basura.

Karon, angay ba nga kaluy-on kining maong mga tawo nga ingon niini og batasan? Kay gusto man ni Mayor Michael Rama nga mahimong susama sa Singapore ang Cebu City, angay sab kita nga mag-estrikto.

Sa Singapore multahan ka kon masakpan ka nga magpataka og pangluwa sa public place, pero dinhi sa ato, daghan sa katawhan ang molabay lang sa ilang sagbot sa karsada.

Ang kaestrikto ni Lee Kuan Yew pagdumala sa Singapore, gihulagway nga maoy nakapalambo sa maong nasud.

Kon gusto ni Mayor Rama nga mahisama sa Singapore ang Cebu City, angay niyang sundon ang gihimo ni Lee Kuan Yew nga mag-estrikto gyud ug pitolon ang mga badlongon.

* * *

Misiaw na man gyud ang krimen karong panahona. Tiaw mo, tulo ka tawo, apil ang usa ka Chinese businessman, gi-kidnap didto sa Carbon Market ug gidala luwan sa sakyanan sa biktima, dayon gitulis ug gibiyaan didto sa Talisay.

Mao na tingali kini ang higayon nga ipakita na sa kapolisan ang ilang katakus, pinaagi sa pagpugong nga mahitabo ang krimen, ug kon may krimen nga mahitabo madakpan nila ang mga naghimo.

Para nako, kining mga tawo nga manulis, ingon man kining magdaladala og armas nga way mga lisensya, angay kining pahamtangan og labing bug-at nga silot. Nakasabot na tingali mo kon unsay buot nakong ipasabot.