EDITORYAL - Ngano mang dugay mahuman ang proyekto?

Daghang mga kalamboang pangpublikong imprastraktura nga makita karon sa kadalanan sa Metro Cebu partikular kining mga nag-unang dagkong siyudad niini sama sa Cebu City, Mandaue City ug Lapu-Lapu City.

Sagad niini may kalabotan sa flood control projects nga gisugdan sa panahon pa sa nakalabay nga administrasyon ug gipadayon sa kasamtangang bag-ong pamunoan sa nasudnong kagamhanan.

Kaning maong mga proyekto gipasiugdahan sa Department of Public Works and Highways nga dunay pagtugot ug gihangop sab sa mga local government units kun diin kini gitrabaho.

Ang uban niini, gitrabaho sa mga nakadaog nga mga pribadong kontraktor. Apan nabantayan nga daghan niining maong mga proyektoha ang gilumotan nalang apan wala pa gyud gihapon nahuman.

Gawas nga pwerteng dugaya nangahuman,  nangaguba sab ang karsada tungod kay ilang gipangkawot ug gipangkanalan unya nga gibalikan ra og tabon og anapog. Mura man og wala sila kahibalo kun unsay sunod nilang buhaton o wala pa sila makadesider kun unsay buhaton, mao nga gibalikan ra nila og tabon og yuta, ang resulta, libaong ug mag-untol untol ang mga sakyanan nga molabay.

Duna pay uban nga walay klarong warning sign o safety barricades aron makabantay ang mga motorista panahon sa kagabhion.

Usa na niini kanang gitrabahong kanal tabok sa MJ Cuenco Avenue gikan sa Bonifacio Street nga isumpay padung sa sapa.

Hagbay na kaayo nang problemaha sa baha diha sa Bonifacio st. lahus sa Sikatuna St. sa Brgy. Pari-an.

Nasugdan na kini og trabaho unya hapit na gyud unta masumpay sa sapa sa Tejero, apan pila naman ka semana wala pa man gihapon matrabaho bisan og gikubkob na ang tunga sa karsada.

Usa lamang kini sa daghan pang mga susamang proyekto sa gobiyerno nga gitrabaho sa mga pribadong kontraktor, dali kaayong makasugod og kutkot ug guba, apan dugay kaayong humanon.

Kinsa may dunay problema, ang DPWH, ang kontraktor o ang LGUs? Unsa man say ikasulti sa mga LGUs ani nga ang ilaha mang konstituwente maoy nahasol?