Naluoy ko’s kawatan

Nasubo kaayo ko pagkasayod nga usa ka amahan nadakpan kay nangawat og bukog sa karneng baboy aron nga iya unta kining sinabawon ug makahigop og sabaw sa karne ang iyang mga anak ug asawa.

Si Junever Vercide, 29, usa lang ka janitor sa dakong mall diha sa Barangay Apas, Cebu City. Dili ko molaban og mga kawatan, apan kining hitaboa lahi ang akong gibati ngadto sa dinakpan.

Kon si Junever nangawat pa og sinena, mga alahas, ug kwarta, dili gyud ko malooy kaniya. Apan ang iyang gikawat mga baligya ra tawon nga bukog sa mga karne aron makatilaw og lami-lami nga sud-an ang iyang pamilya.

Wa gyud maluoy kaniya ang tagdumala sa tindahan kay gikiha gyud nila si Junever. Para nako, dili ko malooy kon gitaktak lang nila kini sa trabaho, apan gikiha gyud tungod lang sa bukog nga kantidad og P116.

Gagmay ra kaayo’g sweldo ang mga ingon kaniya og trabaho. Nalipay gani ko kay ang Regional Tripartite Wages and Productivity Board (RTWPB) mituki na sa awhag nga hatagan og laing usbaw sa sweldo ang mga trabahador sa Sugbo.

Atol sa akong programa sa radyo, gihisgotan nako ang makalolooy nga kaagi ni Junever, ug nalipay ko kay adunay usa sa akong mga viewers sa programa nga mitanyag nga siya maoy mobayad sa P3,000 nga pyansa sa dinakpan.

Awhagon nako ang asawa ni Junever nga kontakon ko sa akong Facebook messenger aron masabotan kon unsaon nga makapyansa ang iyang bana.

* * *

Matud sa Department of Justice (DOJ) nga maoy nagdumala sa mga piskaliya sa nasud, daghan kaayong kaso nga gipang-dismiss lang sa hukmanan kay wa mamaayo sa pag-andam sa kapolisan ug mga prosecutors.

Daghan sab ang gipang-dismiss sa mga piskal kay lugak ang mga ebidensya sa kapolisan. Samtang may mga kaso nga gisang-at sa mga fiscal didto sa korte, wa sab makabarug.

Ang uban na-dismiss sa hukmanan kay wa masubay ang mga gilatid nga lagda, mao nay gitawag og “technicalities.” Mao nga angay’ng magsabot gyud ang mga polis ug piskal.

Balikon nako, ang mga polis nga moapil sa raid, kinahanglang dunay ilang mga kaugalingong notebook nga ilista nila ang mga panghitabo sa pagpahigayon nila’g raid.

Pananglit, asa sila gidestino atol sa raid, ingon man ang ilang mga kauban. Ila kining balikon sa pagbasa sa dili pa moatubang isip witness sa husay sa kaso.

Pananglit moingon ang polis nga atol sa raid diha siya sa may pultahan, apan kon pangutan-on inigsunod husay, moingon na sab nga didto diay siya sa likud sa balay, aw makamugna na kini og pagduda sa huwes.

Timan-i nga kinahanglang “proof beyond reasonable doubt” ang pagkonbikto sa akusado.